La mynjur ka Sorkar Pdeng ban wanrah ïa ka aiñ rew halor ka ‘One Nation One Election’

La mynjur ïa kane ha ka jingïalang ka Kynhun Myntri jong ka Sorkar Pdeng ha ka Sngi Palei bad ïa ka aiñ rew yn sa wanrah ha Parliament ha kane ka dorbar tlang mynta.

Shillong, Nohprah 13

Ka Kynhun Myntri jong ka Sorkar Pdeng hapoh ka jingïalam u Myntri Rangbahduh, Narendra Modi ka la ai jingmynjur ban wanrah noh da ka aiñ rew ha kaba ïa dei bad ka jingpynlong ilekshon noh ha kajuh ka por ha baroh kawei ka ri, kata, ka ilekshon sha Ïingdorbar Lok Sabha bad Ïingdorbar Thawaiñ ha ki jylla bapher bapher.

La mynjur ïa kane ha ka jingïalang ka Kynhun Myntri jong ka Sorkar Pdeng ha ka Sngi Palei bad ïa ka aiñ rew yn sa wanrah ha Parliament ha kane ka dorbar tlang mynta.

Kham mynshwa ha u Nailur mynta u snem, ka kaiphod kaba la pynkhreh da u President barim ka ri u Ram Nath Kovind ka la ïoh jingmynjur na ka Sorkar u Modi halor ka ‘one nation one election.’

Kumta ha kane ka kynti, la antad ba ka Sorkar Pdeng kan wanrah ïa ka aiñ rew ha Ïingdorbar Lok Sabha bad hadien kata yn sa phah shwa sha ka Joint Parliamentary Committee ban pule bniah.

Lada kane aiñ rew ka ïoh jingmynjur na ka Ïingdorbar Lok Sabha bad Rajya Sabha jong ka ri, la tikna ba ka ilekshon MP bad MLA yn pynlong ha kajuh ka por ha baroh kawei ka ri ha u 2029.