La tohkit ki pulit halor ka jingshah thombor ka kali  Myntri

U la ong ba kum kine ki jingthombor ym lah ban pdiang ha ka imlang sahlang kaba la kiew bad shai.

Shillong, Nohprah 13

Ki pulit ka nongbah Shillong ki la pynlong ka jingtohkit kaba bniah halor ka jingshah thombor ka kali ba pyndonkam da ka Myntri Sorkar, Dr. Ampareen Lyngdoh ha ka miet jong ka 10 tarik mynta u bnai.

U Superintendent of Police (City), Dr. Dara Aswaghosh u la ïathuh ba ki pulit ki dang tohkit ban tip, la ka jingshah thombor ka kali jong ka Myntri ka dei kaba shu jia ryngkhat ne kaba la don jingthmu lypa.

U la ïathuh ba kat-kum ka ejahar ba la ujor ha thanat Laitumkhrah, katei ka jingjia ka la jia ha ka por 10:45 eiei mynmiet ha lad ban leit sha Polo katba ka Myntri bad ki bahaïing ki dang wan phai na ka concert u Bryan Adam.

U SP u la ong ruh ba na ka liang ki pulit kin sa tohkit la u nongñiah ïa ka kali u ïohi eiei shwa ban jia, bad pyntip ba ki pulit kin sa bishar bniah ruh na ki CCTV kiba don hajan ka jaka ba mih ka jingjia. 

Halor kane ka jingjia, na ka liang u MLA ka Congress uba dei u Chief Whip ka Liang Pyrshah hapoh ka ïingdorbar thaw aiñ ka Jylla, Bah Ronnie V Lyngdoh, u la pynrem jur ïa ka jingshah thombor ka kali jong ka Myntri, Dr. M Ampareen Lyngdoh.

U la ong ba kum kine ki jingthombor ym lah ban pdiang ha ka imlang sahlang kaba la kiew bad shai.

“Kano-kano ka kam pyntriem ka dei ban shah pynrem. Lada phi don kano-kano ka daw ne jingeh kam dei da ki kam pyntriem ban pynpaw, ki don da kiwei ki lynti”, u la ong.