Na ka shi pela ka sha ba dih u Bah Sanbor, ïoh syndon ka Lumparing da ka jaka sumar 10 jingthiah

La tei ha ka jaka kaba heh kumba 6000 square feet bad u pynpaw ka jingsngewnguh ïa i trai jaka ba la ai sngewbha ban tei ïa ka jaka sumar.

Shillong, Nohprah 13

Ka jinglah u MLA ka South Shillong konstitwensi, Bah Sanbor Shullai ban wanrah ïa ki kam pynroi kiba pynmyntoi ïa ki paidbah ka dei lyngba ki buit treikam kiba bun rukom.

Ki don ki projek kiba urlong lyngba ka jinglah jong u ban buddien bad leit ïakynduh dalade ïa ki ophisar bad ïa ki Myntri Sorkar, bad ki don pat ki kam pynroi kiba u la ïoh tang da kaba shu shong dih sha bad ki Myntri Sorkar.

Kawei na kita ki projek kaba la urlong lyngba ka jingdih sha jong u Bah Sanbor shi pela ha Secretariat ka dei ka jaka sumar kaba shiphew jingthiah kaba la ïaid shaid shaid ka jingpyntrei ha Lumparing.

Katkum ka jingïathuh u Bah Sanbor ha ka Sngi Thohdieng haba leit jurip ïa kane ka jaka sumar kaba tei ha Lumparing, u la pynkynmaw ba dei tang ka jingdih sha jong u shi pela bad u Myntri barim ka Sorkar, u James PK Sangma uba peit ïa ka tnat ka koit ka khiah ha kato ka por ba la lah ban pynïaid shakhmat ïa kane ka projek ha kaba la lah ruh ban mang pisa kumba T.4.99 klur.

U Bah Sanbor u la ai khublei ïa u James kum u Myntri barim ka tnat ka koit ka khiah ha kato ka por, bad kumjuh ïa u Myntri Rangbah u Conrad K Sangma uba la pynurlong lang ïa kane ka projek kaba long ka jingmyntoi ïa ki longïing kiba duna ka ïoh ka kot haba donkam ban ïoh ki lad jingsumar.

Ban nang pynsted shuh shuh ïa ka jingtei ïa kane ka jaka sumar, u Bah Sanbor u la leit ban jurip ïa ki jingtei jingshna ïa kane ka jaka sumar kaba u la ong ka dei kum ka ‘mini hospital.’

La tei ha ka jaka kaba heh kumba 6000 square feet bad u pynpaw ka jingsngewnguh ïa i trai jaka ba la ai sngewbha ban tei ïa ka jaka sumar.

La buhthong ban pyndep noh kloi khnang ban sdang ai jingshakri noh naduh u Nailur 2025.

U la ong ba kane ka jaka ai jingsumar kaba don 10 jingthiah kan ai ka jingshakri na ka bynta ki nongshong shnong ka Lumparing baroh kawei kiba wan na ki longïing longsem ba duna ka ïoh ka kot ki bym kot bor ban leit phah sumar sha kiwei kiwei ki jaka sumar ka ban shisha ka jingïarap.

U Bah Sanbor u la ai khublei ruh ïa ki Dorbar Shnong kiba la kyrshan lang ban phah ka jingtyrwa sha ka Sorkar na ka bynta ban ïoh ïa kane ka jaka sumar hapoh shnong ha kaba ka Sorkar kan pynbiang ïa ki lad jingsumar hangne.