
Shillong, Nohprah 13
Ka United Democratic Party (UDP) ka la pynbna ïa ki 26 ngut kyrtong ban ïakhun ha ka ilekshon MDC ha Khasi Hills Autonomous District Council (KHADC) bad Jaiñtia Hills Autonomous District Council (JHADC) kaba ka Sorkar Jylla kan sa pynbna noh shen.
Napdeng kine 26 ngut, ka UDP ka la phah biang ïa ki ar ngut MLA ba kin ïakhun biang ïa ka ilekshon MDC ha KHADC, kawei ka samla kynthei ryngkat kiwei MDC ba mynta, ki MDC barim bad ki kyrtong bathymmai ha jingpynbna ïa ki kyrtong kaba la long ha ka Sngi Thohdieng ha shlem treikam ka UDP ha Shillong.
Kine ar ngut ki MLA ki long u Bah Pius Marweiñ, MLA ka Ranikor konstitwensi u ban ïakhun biang ïa ka ilekshon na Langrin konstitwensi kaba hap ha South West Khasi Hills District bad u Bah Matthew Beyond Kurbah uba dei u MLA ka Mawphlang konstitwensi, East Khasi Hills un ïakhun hi na Mawphlang Diengiei konstitwensi.
Ïa ki kyrteng jong ki kyrtong la pynbna da u General Secretary, Dr. Jemino Mawthoh bad la pynkup da ka lama jong ka UDP da u President ka seng, Bah Metbah Lyngdoh ha ka General Council.
Ïa ki kyrtong kiba dang sah jong ka seng yn sa pynbna ha kawei ka por ynda ki jylli ki la ai jingmynjur.
Ki 26 ngut kyrtong ba ka UDP ka la pynbna ha KHADC bad JHADC ki long Bah Titosstarwell Chyne uba dei u CEM barim ka KHADC na Sohra, Bah Barikupar Synrem na Shella, Bah Matthew Beyond Kurbah na Mawphlang Diengiei, Bah Desmond K L Mawlong na Nongthymmai, Bah Mitchel Wankhar na Laban-Mawprem, Bah Auguster Jyrwa na Jaïaw, Bah James Ban Basaïawmoit na Pynthorumkhrah-Mawkhar, Bah Equator na Mairang Nongkhlaw, Bah Jambor War na Parïong-Mawthadraishan, Kong Naphishisha Marweiñ na Umroi, Bah James Sylliang na Mawhati, Bah Eddie G Kharbani na Umsning, Bah Balajied Ranee na Nongpoh, Bah Pius Marweiñ na Langrin, Bah Jessland Roy Nongsiej na Mawkyrwat, Bah Sranly Rongrin na Mawshynrut, Bah Lamris Lyngdoh na Muthlong Sohkymphor, Bah Joinriwell Pyrtuh na Bataw Lakadong, Bah Lasky Rymbai na Tuber Wapung, Bah Finelyness Bareh na Rymbai Khliehriat, Bah Rollingson Dkhar na Sutnga Narwan, Bah Eleazer C Dkhar na Shilliangmyntang, Bah Winning Garladn Sungoh na Mookaïaw, Bah Fernado Sumer na Saphai, Bah Riio Sten na Barato-Mukroh, Bah Marki Mulieh na Jowai North.