Shillong, Nohprah 13
Ka Khasi Hills Autonomous District Council (KHADC) ka la pyndep ban wad bniah haduh 38 tylli ki phang kiba ïadei bad ka riti dustur, ka jinglong tynrai bad ka rukom bat khyndew ki Khasi bad kiwei kiwei.
U Chairman ka Research Committee uba dei u executive member, Bah Carnes Sohshang, u la ïathuh ba ïa kitei ki kot yn sa pyllait paidbah noh ha ka 17 tarik mynta u Nohprah da u Myntri Rangbah ka Jylla, Conrad K Sangma bad u Symbud Myntri Rangbah, Bah Prestone Tynsong ha ka jingdon lang ki nongwad bniah, ki khlieh nongsynshar bad kiwei kiwei.
Katkum ka jingïathuh u Bah Carnes ïa ka jingwad bniah la leh da ki kynhun bad don kiba leh marwei kiba dei ki riew shemphang na ki skulbah bad jaka pule, bad ki don kumba 38 tylli ki phang ba la dep ban wad bniah halor ka riti dustur u Khasi.
U la ïathuh ba ka jinglut na ka bynta kane la ïoh na ka Sorkar Jylla lyngba u Myntri Rangbah kaba kot T.50 lak bad ka jingpynlut ka long T.1 lak na ka bynta kawei ka phang.
Haba kylli, u la ïathuh ba ka la shim por palat shisnem ban pyndep ïa kine ki jingwad bniah.
U la ong ba ka KHADC ka la ai ïa ki phang bapher-bapher bad kumba 38 tylli ki phang la lah ban pyndep.
“Kan long ka sngi ban sah kynmaw bad jingkmen namar kum ka jaidbynriew kan ïoh lad ban buh jingthoh ïa ki phang bad jinglong tynrai na ka bynta ka jingmyntoi ki pateng ban wan, khamtam halor ka riti ka dustur, ka rukom bat khyndew bad kiwei”, la ong u Bah Carnes.
