Weng ki MDC Congress ïa ka jingïatreilang na ka EC ka KHDF ba la ïalam ka NPP

Ha kajuh ka por u la ong ba ka jingweng noh jong ka Congress ïa ka jingïatreilang kan ym ktah eiei ïa ka seng ha ka ilekshon MDC ban wan.

Shillong, Nohprah 13

Hadien kumba lai bnai duna ba ki MDC ki la shah pynbor ha ki nongkyrshan bad nong-ïalam jong ka Congress, ha ka Sngi Thohdieng ki MDC ka Congress ki la pynbna ba ki la weng na ka jingïatreilang hapoh ka Executive Committee ka kynhun synrop Khasi Hills Democratic Forum (KHDF) ba la ïalam da ka NPP ha KHADC.

Ka jingdon ki MDC ka Congress ha KHADC ka la kiew sha ka 3 ngut hadien ka jingleit pynïasoh sa u MDC ka Jirang, Bah Victor Ranee nalor ar ngut kiba la don lypa, Bah Ronnie V Lyngdoh bad u Deputy CEM, Bah Pynshngaiñ N Syiem.

Haba pyntip ïa kane, u Working President ka Meghalaya Pradesh Congress Committee (MPCC) uba dei u MDC na Mawkhar-Pynthorum-khrah, Bah Pynshngaiñ N Syiem u la ïathuh ba u la phah ruh ïa ka shithi iehnoh kam kum u Deputy Chief Executive Member bad u Bah Ronnie V Lyngdoh kum u Chairman ka Advisory Committee ka Council sha u Chief Executive Member (CEM), Bah Pynïaid Sing Syiem.

Haba ïathuh ïa ka daw, u la ong ba ki MDC kim don shuh da kawei ka lynti, hynrei ban burom ïa ka jingsngew bad jingai jingmut jong ki nongïalam bad nongtrei jong ka seng.

Ha kajuh ka por u la ong ba ka jingweng noh jong ka Congress ïa ka jingïatreilang kan ym ktah eiei ïa ka seng ha ka ilekshon MDC ban wan.

“Kan ym don jingktah eiei ïa ka ilekshon namar ka shong eh ha ka jingtreikam jong ki Nongïalam. Lada ki MDC ka Congress ki lah ban leh shibun kiei-kiei ha ka por kaba lyngkot, ki paidbah kin kham khmih lynti kham bun na ngi”, u la ong.

Haba kylli, u Bah PN Syiem u la ong ba ka jingmih noh ki MDC ka seng Congress na ka kynhun KHDF kan ym don don jingktah satia ïa ka Executive Committee ba la ïalam da ka NPP, namar ki la don lypa ïa ka jingbun paid.

Haba kylli shuh shuh, u la ong ba ka Congress kan shong noh mynta ha ka Liang Pyrshah kaba wanrah ka jingïatei.

“Ngin don ha ka Liang Pyrshah, hynrei ngin long ka Liang Pyrshah ka ban ïatei, ngin ym long tang ki nongkynthoh haba leh ïa kaba bha. Kaei kaba sngewtynnat ba ka jingweng jong ngi ka Congress kan ym ktah ïa ka EC”, u la ong.

Ha KHADC kumba ka long mynta ki don sa 28 ngut ki MDC ha ka ïingdorbar kaba 30 ngut hadien ba la khlad noh ar ngut. Na ki 28 ngut, ka KHDF ba la ïalam da ka NPP ka dang skhem, namar ka NPP ka la don lypa 15 ngut ki MDC bad ka la ïoh ïa ka jingkyrshan na u MDC shimet ka Nongkrem bad na u MDC shu sieh kaba pynlong ban ïoh ïa ka jingbun paid kaba 17 ngut. Katba ka Liang Pyrshah ka don 11 ngut ki MDC ba kynthup na ka UDP 6 ngut, Congress 3 ngut bad HSPDP 1.