
Jowai, Nohprah 15
Ka jingshna ïa ka Iawmusiang Market Complex, Jowai kaba la long kum ki phngit ïa ki khmat u paidbah ka thaiñ Jaintia Hills namar ka jingsahkut ka jingshna la bun bun snem, yn sa ïohi ïa ka jingkylla ha kaba khatduh hadien ba ka Sorkar MDA ba mynta ba ïalam ka NPP ka la rai ban sdang biang ïa ka jingtei ïa ka.
Kum ka dak ban sdang biang ïa ka kam, la buh ïa u mawnongrim ban pynbha biang ïa ka ïew Iawmusniang da u Symbud Myntri Rangbah ka Jylla u Bah Sniawbhalang Dhar ha Iawmusing Jowai ha ka sngi Thohdieng jong ka taiew.
La ïadonlang u MLA ka Jowai bad Chairman MUDA Bah Wailadmiki Shylla, CEM JHADC u Bah Thombor Shiwat, u Deputy Commissioner ka West Jaiñtia Hills Bah BS Sohliya, IAS, u Superintendent of Police ka West Jaiñtia Hills u Bah C Syrti, u MPS, u Secretary ka PWD (Roads & Buildings) u Bah BW Phira nalor kiwei kiwei.
U Bah Sniawbhalang Dhar u la buh ruh ïa u mawnongrim ban shna ïa ki surok kiba kynthup ïa ka jingjrong baroh kaba 38.163 km ha ka jinglut baroh kaba la kot sha ka T.50 klur na ka bynta ban kyntiew ïa ka jingpynïasoh ha Jowai konstitwensi kata ka surok Jowai (3.2 km), Ialong (11.8 km), Salaroh (4.225 km), Litang (2.8 km), Madur Thymme (6.4 km), Niriang (2.5 km) bad Mukhla (7.5 km) nalor ka jingshna ïa ka surok LNKT 15.1 hapoh ka PMGSY (T.29 klur), ka surok Jongksha-Kharang kaba pynïasoh ïa ka Niriang-Nongjrong (6.5 km) ha ka jinglut kaba la antad ba kan long T.7 klur bad ka surok Sabahmuswang hapoh jong ka RIDF (T.3 klur).
Haba kren ha kane ka sngi, u Bah Sniawbhalang u la pyntip ba ka Sorkar MDA ka la shim ïa ka rai ban sdang biang ïa ka jingtei ïa ka Iawmusiang Market Complex ha ka jinglut baroh kaba T.25.6 klur ha kaba u Pyrkhat Hinge u dei u kontraktor bad la khmih lynti ba yn lah ban pyndep hapoh 24 bnai. U la pynskhem ruh ba kane ka projek ynda la dep kan ai jingmyntoi shibun ïa ki nongkhaïi, bad ki nongshong shnong jong ka thaiñ Jaiñtia Hills.
Haba kren halor ka jingeh jong ka jingpynkhuid ïa ki jaboh jabaiñ kaba pynjynjar ïa ki paidbah jong ka sor Jowai, u Bah Sniawbhalang u la ong ba wat hapdeng ki katto katne ki jingpyrshang jong ka Sorkar bad ka Jowai Municipal Board hynrei kane ka projek pynlang jaboh kam shym la lah ban urlong namar ka jingpyrshah na ki katto katne na ka bynta ka jingmyntoi shimet jong ki. U la bynrap “Ka saiñ pyrthei ka dei na ka bynta shisien san snem, ym baroh 1,825 sngi kumta to ngin sangeh noh ban leh saiñ pyrthei bad pynleit jingmut ha kaba thaw ïa ka mariang kaba kham jyrngam bad kaba khuid.”
Kumta u la kyrpad ïa baroh ki nongshim bynta ban ïasnohkti lang bad ïatreilang bad ka Sorkar na ka bynta ban wad ïa ka lad kaba neh na ka bynta ka jingpynïaid ïa ki jaboh.
Haba pynpaw ïa ka thong jong ka jylla ban ïoh ïa ka ïoh ka kot kaba $10 billion, u Bah Sniawbhalang u la ban jur halor ka jingdonkam ban kyntiew ïa ka kam jngohkai pyrthei ha ka thaiñ Jaiñtia Hills.
Ha kajuh ka por, u MLA ka Jowai uba long ruh u Chairman ka MUDA u la pyntip ba ka Sorkar ka don ha ka jingpynkhreh ban seng ïa ka Nursing College ha West Jaiñtia Hills. U la bynrap ba kan long ka lad ban thaw ïa ki lad kamai ha ka thaiñ.
U Bah Wailadmiki u la pyntip ba ka Meghalaya Games 2025 kan long ha u bnai Kyllalyngkot jong u snem ban wan bad ka jingwan ka Meghalaya Games kan wanrah ïa ki jingpynroi ïa ki jingtei kum ki madan ïalehkai tennis, swimming pool, ki jaka ïalehkai boxing, ki madan ïalehkai phutbol, bad ki jaka ïalehkai nalor ki jingpynbha ïa ki surok, ki kolej, ki skul, um, kaba kynthup ïa ka jingbei tyngka kaba palat T.30 klur.
U Bah Wailadmiki u la khot ïa ki paidbah nongshong shnong ka Jowai ban ïatreilang ban ïoh ïa ka lad kaba neh na ka bynta ka jingpynkhuid ïa ki jaboh kaba pynlong ïa ka sor kaba khuid bad kaba neh.
Kiwei pat kiba la ai jingkren ha kane ka sngi ki kynthup ïa u CEM JHADC Bah Thombor Shiwat, u Secretary PWD Roads and Building Bah BW Phira, Chief Executive Engineer PWD Building Bah James Lakiang, Executive Engineer PWD Building Jowai Division PWD Jowai Division u Bah M Nongpluh, Executive Engineering PWD Roads South Jowai Division Bah RD Pakyntein bad u Superintendent Engineer PWD Roads Jowai Circle Bah M Kharnaior bad nalor kiwei pat.