
Shillong, Nohprah 15
Ka Election Committee jong ka UDP Mawsynram Circle ka la mynjur ïa ka kyrteng jong u Bah Suly Lyngdoh kum kyrtong ka UDP ban ïakhun ïa ka ilekshon MDC na Mawsynram Konstitwensi, East Khasi Hills District.
Katkum ka jingpynbna u General Secretary ka UDP Sengkmie, Dr. Jemino Mawthoh ha ka General Council kaba la long ha ka Sngi Thohdieng, ka Mawsynram Konstitwensi ka dang thylli namar kim pat phah kyrteng na ka jylli treikam.
Katkum ka khubor ba la ïoh lum la ïathuh ba ki don kumba san ngut ki nongkyrshan ka UDP na Mawsynram konstitwensi kiba la trei shitom ban pynjop ïa u Bah Olan Sing Suin ha ka ilekshon MLA kiba la pan tiket ha kane ka ilekshon MDC.
Ki khubor ki ïathuh napdeng kine san ngut, ka election committee ka la jied ïa ka kyrteng u Bah Suly Lyngdoh uba dei na Pongkung bad mynta ka shong sa ha ka Executive Committee ba kan pdiang ne em ïa ka kyrteng jong u.
La ïathuh ba lada ka Executive Committee ka UDP Mawsynram Circle ka pdiang, ka mut kin sa phah noh sha ka UDP East Khasi hills khnang ba kan phah sha ka State Election Committee ba kan ïoh ban pynbna noh ïa ka kyrteng u Bah Suly ha ka wat ba ar.
Haba pyrshang ban ïakren bad u Bah Olan Sing Suin u la ong, ka UDP Mawsynram Circle ka dang pynbeit ïa kane ka kam bad shen kan sa pynbna noh ïa u kyrtong.
Kum ban shu pynkynmaw ka UDP ka la pynbna ïa ki kyrtong haduh 26 ngut na KHADC bad JHADC ba kin ïakhun ïa ka ilekshon MDC ka ban sa long ha u snem 2025.
Napdeng 12 ngut ki MLA ka UDP, ki don 2 ngut ki MLA kiba la pynkhreh ban ïakhun hi ïa ka ilekshon MDC kata u Bah Pius Marweiñ na Langrin bad u Bah Matthew Beyond Kurbah na Mawphlang-Diengiei konstitwensi.
Ki ar tylli konstitwensi ha KHADC kiba dei jong ar ngut ki MLA ka UDP kim pat lah ban pynbna ïa ki kyrtong ha ka wat kaba nyngkong. Kine ki dei ka Sohïong konstitwensi ba la mihkhmat da u Bah Synshar Lyngdoh bad Bah Olan Sing Suin na Mawsynram konstitwensi.