Nagpur, Nohprah 15 (UNI)
Laiphew khyndai ngut ki nongmihkhmat ba shah jied thymmai jong ka Mahayuti (Grand Alliance) ki la bam smai kum ki Myntri ha ka Sorkar Maharashtra hapoh ka jingïalam u Devendra Fadnavis ha ka jingïalang kaba la long ha Raj Bhavan hangne, ha ka Sngi U Blei.
Ka jingap khmih lynti ïa ka Kynhun Myntri khatduh ka la urlong ha ka janmiet shuwa ban long ka Dorbar Tlang jong ka ïingdorbar thaw-aiñ ka Maharashtra, ka ban sdang naduh ka Lah Sngi U Blei (lashai).
Ka la long kaei-kaei ka ban sah kynmaw naba kane ka jingïalang bam smai ka la long ha Nagpur, ka nongbah ba-ar jong ka Jylla, hadien ba khlem pynlong mynta la palat 30 snem.
Na ki 39 ngut ki Myntri, 33 ngut ki kynthup ïa kito hapoh ka Kynhun Myntri katba kiba sah ki kynthup ïa ki Myntri Khynnah. Napdeng kine, 20 ngut ki dei ki Myntri bathymmai ba kynthup ïa 3 ngut ki kynthei.
Na kine 39 ngut, 19 ngut ki dei na ka BJP, 11 ngut na ka Shiv Sena (Shinde) bad 9 ngut na ka NCP (AP).
U State President ka BJP, u Chandrashekhar Bawankule da lade u la khot la wer ïa bun ngut ki MLA hynne ka step bad pyntip halor ka jingïoh kyrdan Myntri jong ki, ong u nongaiktien ka State-BJP, u Sandeep Khardekhar.
Kaba lyngngoh ka long ba 2 ngut ki heh nongïalam ka NCP (AP) bad Myntri barim kum u Chhagan Bhujbal bad Dilip Walse-Patil kim shym la shah kynthup ha ka Kynhun Myntri.
Ki nongïalam ba hakhmat kiba la shim ïa ka jingbam smai ki kynthup ïa u Chandrakant Patil, Hasan Mushrif, Dada Bhuse, Chandrashekhar Bawankule, Girish Mahajan, Sanjay Rathod, Madhuri Misal, Dhananjay Munde, Mangal Lodha lem bad kiwei-kiwei.
U Mangal Lodha u la bam smai ha ka ktien Sanskrit, katba u Hasan Mushrif ha ka kyrteng u ‘Allah’ bad kiwei pat ki la shim ïa ki kyrteng jong ki Blei Hindu ha ka por ba ki bam smai.
