Her ki ‘drone’ na Bangladesh hajan Sohra bad Shella

Kawei na kitei ki UAV, ba la pynithuh lyngba u 'Transponder Code' - TB2R1071, la ong ba la pyntreikam na Tejgaon Airbase, Bangladesh.

Shillong, Nohprah 15

Hadien ka jingkhyllem noh jong ka Sorkar ka Sheikh Hasina ha Bangladesh, ka la don ka jinglap ïa katto-katne tylli ki Bayraktar TB2 Unmanned Aerial Vehicle (UAV) ne ki ‘drone’ jong ka Bangladesh kiba la her hajan jong ka thaiñ Sohra bad Shella.

Ka jingpynher ïa kitei ki ‘drone’ ka la wanrah ka jingsngewkhia ha ka liang ka jingshong shngaiñ ha shi lynter jong ka khappud India-Bangladesh (kaba 443 km kaba don ha Meghalaya), khamtam namar ka jinglong-jingman haba phai sha ka jingïadei hapdeng kine ar ri.

Kine ki UAV ki la her ha suiñ sha ka phang Shatei jong ka Chhatak bad Sunamganj ha Bangladesh, kumba 200 mitar sha ka phang Shathie jong u ‘Zero Line’, ha kawei ka liang kaba la pynlong ïa ki ‘Agency’ ba khmih ïa ka shong suk shong shngaiñ ka India ban kham pynjur ka jingpeitngor haba ïadei bad kane ka liang.

Kawei na kitei ki UAV, ba la pynithuh lyngba u ‘Transponder Code’ – TB2R1071, la ong ba la pyntreikam na Tejgaon Airbase, Bangladesh.

Ki shipai ka BSF ha ka Sngi Saitjaiñ ki la pyntikna ba ïa katei ka Bayraktar UAV ka Bangladesh la lap da ka ‘Radar’ jong ka Indian Air Force (IAF).

Na ka liang ka DGP ka Jylla, Kong Idashisha Nongrang ka la ong ba ka tnad ka la shimkhia ïa kane bad ka BSF lem bad ka IAF wat la kam shym la kwah batai eiei halor ki sienjam ki ban shim haba ïadei bad kane ka bynta.

“Kine ki her shajrong bha bad ym lah ban ïohi ïa ki da ki khmat,” ong uwei u ophisar BSF.

Katkum ka jingïathuh ki ophisar, ïa katei ka UAV lah ban khanglad ne ban pynithuh ïa ka ‘ID’ jong ka da ki tiar teknoliji kum ka ‘Radar’.

Utei u ophisar BSF u la ong ruh ba ka tnad kam don ïa ki tiar ki tar ban tehlakam ïa kum kitei ki ‘drone’ kiba her shajrong suiñ.

“Ka IAF kan sa pynsngew ïa kane sha ki bor ba dei khmih ka Bangladesh,” u la ong.

“Lada dei ki ‘drone’ ki bym da her jrong kum kito kiba la lap ha Punjab, kata, ngi la lah ban leh eiei,” u la bynrap.

Katei ka jingjia ka la jia ha ka sngi ba wan Shillong u nongrwai ba pawnam ka ri Canada, u Bryan Adams.

Ïa kitei ki ‘drone’ la lap hadien ba u Secretary ka tnad kam bar-ri ka India, u Vikram Misri u la pynkut noh ïa ka jingleit jngoh ba kongsan jong u sha Dhaka, da kaba pynksan shuh-shuh ïa ka por jong kane ka kam peitngor ba la kynnoh.

Kumjuh, ïa kiba kum kine ki UAV la lap ruh hajan khappud Bangladesh bad ka phang Shathie ka Tripura, Phang Sepngi ka Mizoram, bad West Bengal.