Ka jingkynthoh u President VPP halor ka ‘concert’ Bryan Adams kaba khlem don jingkitkhlieh: Paul

U la ong ba tang na kawei ka concert u Bryan Adams kiba ïoh jingmyntoi ki dei hi ki briew jong kane ka Jylla.

Shillong, Nohprah 15

U Myntri Kam Jngohkai Pyrthei jong ka Sorkar Jylla, Bah Paul Lyngdoh, u la ong ba ka jingkren u President ka Voice of the People Party (VPP), Bah Ardent M Basaïawmoit ka dei ka jingkren kaba khlem ka jingkitkhlieh, uba la kynthoh ba ka concert u Bryan Adams ka dei u dawai pynjah tyrha shipor ‘painkiller’.

“Kine ki jingkren ki long kiba khlem don ka jingkitkhlieh, namar ngi don ïa ki jingshisha kiba kyrshan ïa ka jingpyrshang jong ka Sorkar ban kyntiew ïa ka kam jngohkai pyrthei”, la ong u Bah Paul haba kren bad katto-katne ki lad pathai khubor.

U la ong ba tang na kawei ka concert u Bryan Adams kiba ïoh jingmyntoi ki dei hi ki briew jong kane ka Jylla.

Katkum ka jingong u Bah Paul ki jingmyntoi ba lah ban ïohi na ka jingwan rwai u Bryan Adams ki long ka Jingpynpaw jong u Bryan Adams hapoh ka Instagram account kaba u don da ki million ngut kiba bud ïa u. “U la buh ïa ki dur ba u wan ban rwai sha Shillong. Kane ka mut ba ki briew kylleng sawdong ka pyrthei, wat kito ki bym pat ïohsngew ïa ka kyrteng jong ka Shillong ruh mynta ki la tip kaei ka Shillong,” u la ong bad bynrap ba kiwei ki nongtem nongrwai kiba wan sha kane ka Jylla ruh ki long kumjuh.

U la ïathuh ruh ba ka jaiñ ryndia kaba la pynkup ïa u Bryan Adams ka la pawnam, namar haduh 12 tylli ki ryndia u Bryan Adams u la pan shuh ban rah sha Canada ban sam pat ïa ki paralok ba ïatem lang bad u, nalor ka jingpynpaw pyrthei ïa ka Shillong Airport kaba don ha Umroi.

“Lada phi shim na katei ka concert, ka jingthmu hi ka long ban khring ïa ki nongjngohkai sha kane ka Jylla jong ngi. Kiba ïoh nangta naduh kiba die dukan bad kiwei ki dei ki briew jong ngi”, u la ong.

“Ban ong ba kata ka dei u ‘painkiller’ kata ka dei kaei-kaei kaba tohmet namar kiba ïohnong ki dei hi ki briew ki jong ngi”, la bynrap shuh shuh u Bah Paul.

Ha kaba ïadei bad ka jingkynthoh ka VPP halor ka jingkhang ïa ki skul namar ka concert, u Myntri uba dei ruh u nongaiktien ka Sorkar MDA, u la ong ba ki juh ki briew kiba mynta ki kynthoh ïa ka jingphah khang ka Sorkar ïa ki skul. Kine ki juh ki briew ki ban kynthoh lada ka Sorkar kam phah khang ïa ki skul.