Khlad 2 ngut ki nong Meghalaya ha ka jingjia aksiden ha Boko

La ong ba mar ïa ïoh jingtip, ki pulit ka Boko ki la poi ha katei ka jaka jong ka jingjia bad ban shimti noh ïa ki metïap bad ruh ban kurup noh ïa katei...

Boko, Nohprah 15

Ar ngut ki briew ki la duh ei noh la ka jingim hadien ba ki la khlad noh hashen ha ka jingjia shah tynrah kali kaba la jia ha ka janmiet jong ka Sngi U Blei ha shnong Paneri kaba hap hapoh ka thanat Boko.

Kine ar ngut kiba la khlad noh hashen ki dei ba la tip kyrteng kum u Therang Sangma bad Ishak Sangma, kiba dei shi kñi shi pyrsa kiba trei ha kawei ka karkhana kaba hap hapoh ka Chaygaon Industrial Growth Centre.

Katkum ki tyllong khubor na ki pulit, la ong ba kitei ar ngut ki briew ki dei na Mendipathar kaba hap ha North Garo Hills district. La ong ba ha katei ka janmiet ki la don ha lynti ban leit phai, hadien ba ki la dep ban phah shna ïa ka bicycle jong ki, bad dei ha kum kane ka por ba ka trok kaba don ïa u registration number WB59-D-1465 ka la tynrah ïa ki.

La ong ba mar ïa ïoh jingtip, ki pulit ka Boko ki la poi ha katei ka jaka jong ka jingjia bad ban shimti noh ïa ki metïap bad ruh ban kurup noh ïa katei ka trok. Ki pulit ka Boko kin sa pynkit noh ïa kitei ki metïap ha ka Lah Sngi U Blei sha Guwahati Medical College Hospital na ka bynta ban pyndep ïa ka postmortem.