Plie noh ïa ka Krem Mawjymbuiñ lane ngin khang ïa ki surok ba rung sha Meghalaya

Nalor kane ka jingdawa, kane ka seng jong ki Hindu ka la ai por ruh 10 sngi ïa ka Sorkar Meghalaya ban plie biang ïa ka Krem Mawjymbuiñ.

Guwahati, Nohprah 15

Ka Kutumba Surakshya Parishad (KSP) ka seng ki Hindu, ka la mih biang shakhmat ban dawa ba dei ban plie biang noh ïa ka Krem Mawjymbuiñ kaba don ha Mawsynram na ka bynta ban pynïaid shakhmat biang ïa ki jinglehniam jong ki ‘riewngeit Hindu.

Nalor kane ka jingdawa, kane ka seng jong ki Hindu ka la ai por ruh 10 sngi ïa ka Sorkar Meghalaya ban plie biang ïa ka Krem Mawjymbuiñ. Ka la byrngem ruh lada ym lah ban shimkhia halor kane, ka seng kan pakhang lut ïa baroh ki surok ba kongsan kiba rung sha Meghalaya ba kynthup ïa ka Jorabat marjan bad ka Guwahati.

Lah ban pynkynmaw ba ka kynrum-kynram halor ka Krem Mawjymbuiñ ha Mawsynram, kaba jngai kumba 60 km na Shillong, ka la ïaid mynta la katto-katne bnai. Kane ka krem ka don ïa u mawshun uba ki Hindu ki ngeit ba u dei u Blei Shiva. Hynrei, naduh ka 6 tarik Nailar 2024, ka Dorbar Shnong Mawsynram ka la khang ïa ka jinglehniam hapoh kane ka krem da kaba kdew ïa ki daw bapher-bapher.

Kane ka kam ka la poi ruh sha ka jingbishar jong ka ïingbishar Meghalaya High Court, kaba la bthah ïa ka Sorkar Jylla ba kan ïakren bad ki kynhun bapher-bapher ban pynbeit ïa ka kam.

Wat hapdeng kane, u President ka KSP Satya Ranjay Borah u la kam ba ka Sorkar kam shym la leh eiei ïa kane ka kam.

Haba dawa ban plie biang ïa ka jinglehniam ki Hindu ha kane ka jaka, u la dawa ïa ka Sorkar Jylla ban khang lad ïa kino-kino ki kam ki bym ïahap ha sawdong jong kane ka krem.

U Satya u la kynnoh ruh ïa ka Sorkar halor ka jingbym larkam bad jingbym shimkhia ïa kane ka kam haba kynnoh ïa ki bor ka Sorkar kynthup ïa ka Deputy Commissioner bad Superintendent of Police ba ki khlem pyndep ïa la ka kamram.

Namar kata, ka KSP ka la byrngem ban pakhang lynti ïa ki surok ba kongsan kiba wan sha Meghalaya kynthup ïa ka Jorabat (Guwahati), Paikan (Goalpara), lada ym plie noh ïa kane ka krem ban lehniam ki paid Hindu hapoh ka por ba la buh. Ka ong ruh lada mih kino-kino huri-hura ka Sorkar Jylla kan hap ban shim jingkitkhlieh.