
Shillong, Nohprah 15
Ka Meghalaya State Rural Livelihood Society (MSRLS) ka la pynlong ïa ka jingpyninam ne ka Fashion Show ïa ki jaiñ kiba la suh da ki Self Help Group kiba wan ban ïashimbynta ha ka 5th Meghalaya Saras Aajeevika Fair 2024 kaba la pynlong ha ka 13 tarik mynta u bnai ha Mawïongrim pyrshah ka Shillong Hyundai.
Kane ka jingpyninam ïa ki mar ki mata ba la wanrah da ki Self Help Group ha Mawïongrim la sdang naduh ka 5 tarik bad kut ha ka 15 tarik mynta u bnai.
Ha ka janmiet jong ka 13 tarik mynta u Nohprah la pynlong ïa ka jingpyninam ïa ki jaiñ ha kaba ki don palat 24 ngut ki samla kynthei bad ki heprit kiba la mih sha rynsan ban phong da ki sopti bad ki jaiñsem ba la suh da ki Self Help Group.
Ha kane ka janmiet u Bah Federick Roy Kharkongor, IAS bad kum Principal Secretary ka tnat Textile jong ka Sorkar Jylla, u la long kum u Kongsan ha ka jingïadonlang u SC Sadhu, IAS kum Director ka C&RD jong ka Sorkar Jylla, u CH Ramakrishna, IAS Chief Executive Officer, MSRLS ha ka jingsakhi lang ki dkhot na ki Self Help Group kiba la wan na kylleng ka jylla.
Haba ai jingkren ha ka jingïalang, u Bah Kharkongor u la ai khublei ïa ki Self Help Group kiba la shna ïa ki tiar ban wan pyni nam ha kane ka ïew ïadie ïathied ha Shillong.
U la ong ruh ban wanrah ïa ka jingjop donkam ka jingtrei shitom ka jingïaishah.