Sdang ïaid shaid-shaid ka jingpyntrei ïa ka surok Shillong Western Bypass

La khmih lynti ba ïa kane ka projek yn lah ban pyndep hapoh ki ar snem naduh ba la sdang ïa kane ka kam.

Shillong, Nohprah 15

Ka jingpyntrei ïa ka surok Shillong Western Bypass kaba la sahkut katto-katne por, mynta ka la ïaid shaid-shaid shakhmat.

Katkum ka khubor na ki heh jong ka National Highways and Infras tructure Development Corporation Limited (NHIDCL) la ong ba ka jingtrei ka la sdang ha baroh lai tylli ki package jong ka projek.

“Kumba ka long mynta, ki kontraktor ki dang bunkam ha ka kam ban ot ne pynmadan ïa u lum bad ha u bnai Lber bad Ïaïong jong u snem ban wan, ka kam jong kane ka projek kan sa nang ïaid shaid-shaid shakhmat,” la ong ki briew jong ka NHIDCL.

Ka surok Shillong Western Bypass kaba jrong kumba 38.256-km ka dei kaba la pyntrei ha ki lai tylli ki package. Ka jingmang pisa baroh na ka bynta ka surok kaba jrong kumba 12.80-km ha ka package-I ka long T.620 klur bad ïa kaba la pyntrei da ka Anusha Projects Private Ltd bad ka BKD Infrastructures Private Ltd hapoh ka joint venture.

Ka surok kaba jrong 11.99-km ha ka package-II pat la pyntrei da ka Narendra Sharma bad TK Engineering Consortium Private Ltd hapoh ka joint venture ha ka jingmang pisa kaba T.686 klur.

Katba ka package kaba lai, kaba ka surok ka jrong kumba 13.56 km, ka dei kaba la pyntrei da ka BRN Infrastructures Private Ltd ha ka jingmang pisa kaba long T.562 klur.

Ïa kitei ki agency ki ban pyntreikam ïa katei ka kam la thung ha u bnai Nailur jong une u snem bad na ka liang jong ki kontraktor ruh ki la shim katto katne sngi na ka bynta ban pynbit pynbiang ïa ki tiar ki tar na ka bynta ban pyndonkam ha kaba pyntrei ïa katei ka projek.

Ka jingwanrah ïa ka projek jong ka Shillong Western Bypass ka long da ka jingthmu ban pynduna ïa ka jingdheng kali ha nongbah Shillong. La khmih lynti ba ïa kane ka projek yn lah ban pyndep hapoh ki ar snem naduh ba la sdang ïa kane ka kam.