Shongkun ka Dorbar ki Soo Langdoh ha madan Lariang Ialong

Kaba kham kyrpang shuh shuh ha kane ka dorbar da ka jingdon ka suit ka shor bad nguh blei nguh syiem ki Soo Langdoh ryngkat bad u Dolloi bad ki 'riew rangbah.

Jowai, Nohprah 15

Ka Dorbar ki Soo Langdoh ha madan Lariang, Ialong ka dei kawei na ki Dorbar ba kyrpang jong ki shakri Niam hapoh ki Soo Raij-Soo Langdoh katkum ka rukom dustur hikai niam ha ka jingïalam u Dolloi kum u khlieh ka Niam Khlieh ka Elaka.

Ïa kane ka Dorbar ki Soo Langdoh la pynlong ha ka 15 tarik Nohprah ha ka jingsakhi lang ki shakri niam jong ki Soo Raij-Soo Langdoh, ki nongïalam jong ki Seiñ raij kynthup naduh u Ma OH Toi President Seiñ raij Jwai, Ma Pyrkhat Shylla President Seiñraij Ialong, Ma Ker Lakiang General Secretary Seiñ raij Chyrmang bad Ma H Phawa Seiñraij Tuber nalor ki longkmie longkpa bad ki samla ha ka jingïalang kaba la pynïaid da u Pator ka Raij Jwai Rangbah Ray mand Nartiang.

Ha kane ka Dorbar, ki Soo Langdoh ki la pyn bna ïa ki sngi ki taïew jong ka shad Niam Behdieñkhlam jong u snem 2025. Ha Raij Chyrmang ka shad Niam Behdeiñkhlam kan long ha ka 1 tarik Jymmang, ha Raij Jwai ka sngi pynkut ïa ka Shad Niam Behdieñkhlam kan long ha ka 14 tarik Naitung, ha Raij Tuber ka sngi pynkut ïa ka Chad Niam Behdeinkhlam kan long ha ka 22 Naitung katba ha Raij Ialong ka sngi pynkut ïa ka shad Niam behdieñkhlam kan long ha ka 7 traik Nailar 2025.

U Dolloi ka Elaka Jwai Rangbah Puramon Kynjing u pynpaw ba u dap da ka jingsngewnguh ïa ki Soo Langdoh kiba la trei shitom ha ka ban pyndep ïa ki kam niam ha la ki jong ki jong ki raij ki shnong na ka bynta ban bit ban biang ka shnong ka raij ha baroh ki liang.

Ha kajuh ka por u khot wer ïa ki kur kiba don bynta ha ki kam niam ha ki raij ban pynmih ïa ki kñi bad longkmie ban kit ban bah ïa ka lyngkor jong ka jingshakri niam hapoh ki raij ki shnong khnang ban im ban neh ka niam ka rukom, dustur, riti pateng la pateng.

Kaba kham kyrpang shuh shuh ha kane ka dorbar da ka jingdon ka suit ka shor bad nguh blei nguh syiem ki Soo Langdoh ryngkat bad u Dolloi bad ki ‘riew rangbah.

La ïoh ruh ki jingkren jingbatai halor ki phang bapher bapher ha kaba u Myown Chyrmang Kni ka Raij Jwai u la kren halor ka phang “I kam Dong”. U Jadeja Dkhar Maji ka Raij Tuber u la kren halor ka phang “I kitkhia ya ki kam niam, iow suk u saiñ ka Raij ka Chnong”. U Pyrkhat Shylla President Seinraij Tuber u la kren halor ka phang “I kreh bha ki nongkrehniam ku ka niam ka rukom” katba u Ker Lakiang General Secretary Seinraij Chyrmang ula kren halor ka phang “I dor wa ka nongrim ka yutang kñia pyrthat”.

Shwa ban poi shaba kut jong ka Dorbar, u Dolloi kum u khlieh ka niam khlieh ka Elaka u la pynsngew hakhmat ka dorbar ïa ka dustur riti jied Langdoh bad Pynkyntang Langdoh ha kaba da kawei ka sur jong uba bun balang la rai ba ki Soo Langdoh-Soo Raij ki dei ban ïakren ïaphylliew jingmut sani bha ïa kane ka bynta ha la ki jong ki jong ki shnong ki raij khnang ba kano kano ka jingthoh ka ban phah sha ka JHADC na ka bynta ban pynrung hapoh ka Customary Law kan long kaba la biang khnang ban lait ka pateng na ka jingkulmar bad kutlad.