Tyrwa ka West Shillong BCC ïa ka kyrteng u Bah Gerald kum kyrtong

Ka 18-West Shillong Block Congress Committee (BCC) ka la tyrwa bad phah ïa ka kyrteng jong u Bah Gerald Shullai ban long kum kyrtong ka seng ha ka ilekshon MDC ka ban sa long ha...

Shillong, Nohprah 15

Ka 18-West Shillong Block Congress Committee (BCC) ka la tyrwa bad phah ïa ka kyrteng jong u Bah Gerald Shullai ban long kum kyrtong ka seng ha ka ilekshon MDC ka ban sa long ha u snem 2025 na Jaïaw Konstitwensi.             

Ïa kane la pynbna ruh da u President District Shillong City Congress Committee, Dr Omarlin Kyndiah ha ka jingïalang jong ka 18-West Shillong BCC kaba la long ha ka 13 tarik mynta u bnai ha Mawprem. 

U Dr. Omarlin u la ong ba ka 13 tarik ka la dei ka sngi ba khatduh ba ki block kin pdiang ïa ki kyrteng, bad ban pynpoi pat sha ka district ha ka 17 tarik mynta u bnai ïa ka kyrteng jong ki kyrtong ba ki la jied.

Shuh shuh une u Nongïalam ka Congress u la ong ba na ki 6 tylli ki konstitwensi kiba hap hapoh ka Shillong City, dang ïoh tang ïa ka kyrteng jong u Bah Gerald Shullai bad la sngewthuh ba un dei ma u kyrtong jong ka Congress na Jaïaw Konstitwensi ha ka ilekshon MDC.

U la ong ba ka Congress ka ïaid katkum ki kyndon, haba pynbna kyrtong ym ba ki bor bahalor kin jied ïa ki kyrtong, kum ka Congress, don hakhlieh duh ka MPCC nangta ka district congress committee, block congress committee bad dei ki dkhot jong ka block ban jied ne tyrwa ïa u briew ba ki sngewbit ban long u kyrtong.

U Dr. Omarlin u la ong ba don kawei ka seng saiñ pyrthei kaba jied ïa ki kyrtong da ki Nongïalam najrong namar kim don ïa ki nongtrei ha madan ne ba kin don ïa ki block ne unit ruh kumjuh.