
Shillong, Nohprah 15
Hadien ba ka Kynhun Myntri jong ka Sorkar Jylla ka la ai jingmynjur ban pynkylla ïa ki kyndon hapoh ka aiñ Meghalaya State Investment Promotion & Facilitation Act (MSIPF), 2024, ha kaba la ailad sa ïa kawei pat ka tnat Sorkar, ka Invest Meghalaya Authority (IMA) ban thied khyndew khnang ban pynsuk ïa ki nongseng kam bad nongseng karkhana, ki la mih ki jingkynthoh na kiba bun ki liang.
Kawei na ki jingkynthoh ka long ba katei ka jingailad ïa ka IMA ban thied khyndew ka long kum ka jingplie lad ïa ki nongbei tyngka kiba nabar ba kin ïoh thied jaka hi katba ki mon kaba long ka jingpynkheiñ ïa ki kyndon jong ka Meghalaya Transfer of Land (Regulation) Act, 1971.
Na ka liang ka Sorkar Jylla ka la pynshai ba kan ym don satia kaba kum kata ka jingailad ïa ki nongbei tyngka kiba nabar ba kin thied jaka hi katba ki mon ha Meghalaya.
Ka la pynshai ruh ba ka Sorkar Meghalaya ka la pynlong aiñ ïa ka Meghalaya State Investment Promotion & Facilitation Act (MSIPF), 2024, bad la pynbna ha ka 14 tarik Lber, 2024 khnang ban pynsuk ïa ki lad ki lynti ban sdang ban pynïaid ïa ki kam karkhana bad ki kam seng kam seng jam, bad lyngba kine ki kam, ka jylla kan kiew arted bad ki nongshong shnong trai ri trai muluk, khamtam ki samla, kin ïoh kam ïoh jam.
Nalorkata, ka Sorkar ka la pyntip ba la thaw ïa ka IMA kum ka shlem ka ban peit halor ki kam bei tyngka bad ka seng kam seng jam, da kaba bud nuksa na kiwei pat ki Jylla ka thaiñ Shatei Lam-Mihngi, kumba la ai jingmut da ka tnat Development of North-Eastern Region (DONER) jong ka Sorkar India. Kane ka sienjam ba la thaw ïa ka IMA ka long ruh katkum ki kyndon jong ka MSIPF Act, 2024, ïa kaba la mynjur da ka Ïingdorbar Thawaiñ ha u Lber 2024.
Ka jingpynkylla ba dang shen ïa ka Meghalaya State Investment Promotion & Facilitation Act (MSIPF), 2024, ka long ban ailad ïa ka IMA ba kan thied jaka na ka bynta ban ïoh pynïeng ïa ki karkhana.
Ka jingthied jaka da ki tnat treikam ka Sorkar ka long ka kam kaba la ïaid lypa. Kum ka nuksa, ka Meghalaya Industrial Development Corporation (MIDC), Meghalaya Tourism Development Corporation (MTDC), bad ka New Shillong Township Development Agency (NSTDA) ki dei ki tnat kiba la ïoh bor ba kin thied jaka lane ban thaw ïa kata ka ‘Land Bank’.
Shuh shuh ka Sorkar ka la ong ba kam don satia kano-kano ka bynta ban ong ba ki nongbei tyngka ki lah ban thied hi ïa ka jaka. Wat na ka bynta ki kam seng karkhana, ïa ka khyndew ka shyiap yn ai katkum ki kyndon jong ka Meghalaya Transfer of Land (Regulation) Act, 1971.
Lah ban kdew ba ka Meghalaya Industrial & Investment Promotion Policy (MIIPP), 2024, ka don ïa ki kyndon kyrpang na ka bynta ka jingai kam ai jam da ki karkhana bathymmai. Ka kyndon 3.1.11 jong ka MIIPP, 2024 ka kdew shai ba kano-kano ka karkhana kan hap ban ai ym duna ïa ka 90 na ka 100 ïa ki kam ki bym dei kiba shalor (non-managerial posts) ïa ki trai jylla. Nalorkata, 50 na ka 100 ki kam ki jam kiba halor dei ban ai ïa ki trai jylla.