
Nongstoiñ, Nohprah 15
Ban nang pynkhlaiñ shuh shuh ïa ka seng hapoh ka Rambrai-Jyrngam Konstitwensi, ha kine ki khyndiat sngi ba la dep, ka National People Youth Front (NPYF) Rambrai Block ka la ïoh ban pynskhem ïa ki nongkitkam kiba thymmai ha kaba u Bah Donboklang Kharbani u la shah jied kum u President.
Ïa katei ka jingïalang pynskhem ïa ki nongkitkam kiba thymmai jong ka NPYF Rambrai Block la pynlong ha Nongstoiñ ha kaba u President ka NPP Rambrai Block u Bah Kimfa Marbaniang u la ïoh ban pynskhem ïa ki nongkitkam thymmai.
Shuh shuh ha kane ka sngi, nalor u Bah Donboklang Kharbani kum President, u Bah Johnfisher Syiem u la shah jied kum u General Secretary bad kiwei kiwei ki nongkitkam, lem bad katto katne ki post la buh kyrpang na ka bynta ka Garo Zone ka ban sa pynlong shen ïa ka jingïalang.
Ha kane ka sngi la pynshit pynshngaiñ ruh da ka jingdonlang ki ‘riew rangbah, ki longkmie, u Working President ka NPP West Khasi Hills NPYF, Bah P Mawtyllup bad kiwei kiwei.
Haba kren ha kane ka sngi, u Bah Kimfa Marbaniang u la pyntip ba ha kaba ïadei bad ar tylli ki block, ka Sorkar kan sa mang pisa na ka bynta ban tei ïa ka building. U la kyntu ruh ïa ki samla bad ki paidbah ka Rambrai ba kin nang ïai ai ka jingïatreilang khnang ban wanrah shuh shuh ki kam pynroi hapoh ka konstitwensi.