
Shillong, Nohprah 15
Ka Sorkar Jylla ka dang wad ïa ka lad ban wanrah ïa ka prokram ai jinghikai ne ‘Vocational Training Programme’ ha ki ‘Rehabilitation Centre’ jong ka Jylla kum shi bynta ban pynkup bor ïa ki briew kiba dang ïakhun ban lait na ki jingdih pynbuaid khnang ba kin don ïa ki sap treikam bad ban ïoh noh ïa ka jingim da kaba ïeng ha la ki jong ki kjat.
U Mission Director ka Drug Reduction, Elimination & Action Mission (DREAM), Bah Francis Kharshïing ha ka Sngi Thohdieng u la lum ïa ka jingïalang bad ki ‘riew shemphang na ki jaka pule bapher-bapher kum ka Industrial Training Institute (ITI), Meghalaya Skill Development, Bosco Integrated Development Society – (BIDS) bad kiwei-kiwei ki tnad ban ai ïa ka jinghikai kam khlem jingsiew eiei ha ki ‘Rehabilitation Centre’.
Haba kren bad ki nongthoh khubor hadien ka jingïalang, u la ong ba ki la lap ba ki don kumba 80% na ki nongdih drok kiba la phai biang sha ka jingdih drok hadien ba ki la mih na ki ‘Rehabilitation Centre’.
“Nga don ka jingmut ban sdang ïa ki prokram ai jinghikai ha ki ‘Rehabilitation Centre’. Kane kan ïarap ïa kito kiba pyndonkam drok ban ïadon bynta ha ki kam kiba seisoh,” la ong u Bah Kharshïing.
Da kaba pynpaw ba kane kan ïarap ym tang ban tei ïa ka jingskhem jingmut jong ki, u la ong ba ki lah ban kamai jakpoh da kaba leh eiei na ka kam kaba ki la shah hikai ha ka por ba ki don bynta ha ka prokram.
“Ngi la don ka jingïakren halor kumno ngin lah ban ïaid shakhmat bad kner jingïarap ïa ki nongdih drok ban long kiba laitluid hadien ba ki la mih na ki ‘Rehabilitation Centre’,” u la ong.
U Mission Director u la ïathuh ruh ba kin sa don sa kawei ka jingïalang bad ki tnad Sorkar bapher-bapher kum ka tnad dohkha-dohpnat bad tnad kam ri jingri ban ïarap ai jinghikai ïa kito kiba la ngop ha ki jingdih pynbuaid.
“Nga sngewkmen namar ba ka jingmih ka long kaba bha na ki ‘riew shemphang ban sdang ïa kane ka kam,” u la ong.
Katkum ka jingong jong u, kin hap ban ap bad khmih bniah la kane ka jingmut kan long kaba jop ne em.