Shillong, Nohprah 16
Ka Meghalaya SSA School Association (MSSASA) ha ka Lah Sngi U Blei ka la ai jingmut ïa ka Sorkar ba kan thung noh da ka ‘Empowered Committee’ ban ïakren halor ki mat ba ïadei bad ki nonghikai SSA kumjuh ban wanrah ïa ka mat treikam halor ka jingshngaiñ ka kam ki nonghikai SSA hapoh ka Jylla.
“Ngi la shim ka rai ban ai jingmut ïa ka Sorkar ba kan thung noh ïa ka ‘Empowered Committee’ bad ki dkhot jong kane ka komiti kin dei na ka tnad aiñ, ‘Personnel’, tnad pla tyngka, ‘Planning’, tnad pule-puthi bad na ka seng,” ong u President ka MSSASA, Bah Aristotle C. Rymbai haba kren sha ki lad pathai khubor hadien ka jingïalang ‘General Meeting’ jong ka seng ha Madan Student, Jaïaw.
U la ong ruh ba ïa ki kam kiba dang sah ban ïakren bin-pa-bin haba ïadei bad ki jingkdew kiba ka seng ka la ai jingmut sha ka Sorkar ba kan kynthup lang ha ka mat treikam na bynta ka jingshgaiñ ha ka kam ki nonghikai SSA, dei ban ïakren noh da ka ‘Empowered Committee’.
Kane ka dei ruh ka jingïalang kaba ar jong ka seng hadien ka jingïakynduh bad ka Sorkar ha ka 18 tarik u Naiwieng bad 4 tarik u Nohprah mynta u snem.
Halor ka rai kaba ka seng ka la shim ha ka 2 tarik u Risaw, 2024 ban pynlong ïa ki prokram ïakhih lada kam ïoh ka jubab kaba lam sha ka jingmanbha na ka Sorkar, u President u la ong ba ka seng da kawei ka sur, ka la shim ïa ka rai ban ym bteng shuh ïa ka jingïakhih hynrei ban bteng ïa ka jingïakren bad ka Sorkar.
Haba phai pat sha ka bynta ba ïadei bad ka eksamin MTET, u Bah Rymbai u la bynrap, “Haba ïadei bad ki nonghikai kiba dang dei ban ïaleh ïa ka MTET, ngi la shim ïa ka rai ba ka Sorkar kan pyrkhat lang (ban pyllait) ïa baroh ki nonghikai SSA kiba pynïasoh ha lane shuwa ka 1 tarik Naitung, 2020, kaba dei ka tarik kaba na ka liang ka tnad pule-puthi ka la pynmih ïa ka jingpynbna ha ka 1 tarik Naitung, 2020 kaba ong ba ka MTET ka long kaba kongsan ïa baroh naduh ka sngi ba pynmih ïa ka jingpynbna ïa kiba kwah ban long kum ki nonghikai.”
