Shillong, Nohprah 16
U Rakkam A Sangma uba dei u Myntri hapoh ka Sorkar MDA-II, u la ong ba ha kane ka pateng kaba mynta ban ïohsngew ba ki don ki briew ki bym sngewtynnat bad kiba pyrshah ban wan ki nongrwai nongtem ba pawnam ka pyrthei sha Shillong, ka long kaei-kaei ka bym lah pyrkhat, khamtam ba ki paidbah nongshong shnong ki sngewtynnat ban sngap bad ban ïohi.
Kane ka jingkren u Rakkam ka long halor ka jingkren pyrshah u Bah Ardent M Basaïawmoit ïa ka jingpynlong tamasa rwai (concert) jong u Bryan Adams ha JN Stadium, Polo, Shillong.
Haba kren ha ka jingïalang ha Smit ha ka taïew ba la dep, u Bah Ardent uba dei u President ka Voice of the People Party (VPP), u la kynthoh ba ka jingpynlong ka Sorkar ïa ki tamasa ka long tang kum ka jingpyrshang ban pynbiej ïa ki paidbah ban pynjah ïa ka jingtyrha.
“Shu buh lada ki (VPP) ki ïoh ha ka bor, ka mut kin ym shah ïa ki nongrwai ba kin wan sha Shillong, kum kane ka jingkren ka long ka bym sngewtynnat, kaba pynduh mynsiem bad kaba ki samla kin ym pdiang”, la ong u Rakkam.
U la buh jingkylli shuh shuh ïa u Nongïalam ka VPP da kaba ong, “Lashai hadien habud lada wan ïalehkai u Ronaldo, u Messi bad kiwei ki khlur pawnam, hato kin ym shah?”.
U Rakkam u la ong shuh shuh ba um lah ban sngewthuh ïa kane ka rukom pyrshah jong ka VPP, da kaba bynrap, hato kim sngewtynnat ïa ki jingrwai?.
“Lada ngam bakla wat ki paralok, ki bahaïing bad ki nongkyrshan jong ka VPP ki la leit ban sngewtynnat lang ha Polo”, la ong u Myntri.
U la ong ba ka jingwan u Bryan Adams ka la pynpawnam ïa ka Shillong kaba don ha India bad ka pyrthei mynta ka la tip satlak ïa ka Shillong da ka jingwan u Bryan Adams.
U la buh jingkylli, lada ka VPP ka thaw sorkar hato kam kwah ban kyntiew ïa ka siaw ka rwai khamtam ïa ki samla ka jylla. “Kane ka jingkren jong u (Ardent), kam ïahap ïa ki samla ka jylla kiba don ka thong ha ka jingim”, ong u Rakkam.
U Rakkam u la ong ba ma u shimet u kwah shuh ban wan ki nongrwai kiba pawnam ban kyntiew ïa ka jylla, bad bynrap da kaba ong, hato lada rwai u Rakkam A Sangma kin wan sngap ki paidbah kumba rwai u Byran Adams?.
Haba kdew ïa ki jingmyntoi na ka jingwan u Bryan Adams, u Myntri u la ong ba kane ka jingwan ka la wanrah kamai ïa ki paidbah ka Jylla, naduh ki nongbuh ïing basa, ki nongdie dukan, ki nongñiah kali bad ïa kiwei ruh ha ki rukom bapher-bapher.
