
Shillong, Nohprah 16
Ki runar bym lah ban ithuh, hadien ba ki la khanglad ïa kawei ka kali bad shoh ïa u nongñiah bad ïa uwei pat, ki la lute pat sa ka pisa da ki lak tyngka na kine ki briew.
Katkum ka khubor kaba la ïoh na ki pulit la ong ba ha ka step jong ka 12 tarik mynta u bnai, u Monowar Hussain (27 snem) ryngkat bad san ngut kiwei pat ki la leit mih hakhmat jong ka Rongsak OP ha East Garo Hills bad ban ai ka jingujor da ka ktien halor katei ka jingjia.
Haba batai bniah halor ka jingjia, u Monowar u la ong ba ma u lem bad san ngut kiwei pat katba ki dang don ha lynti ban leit sha shnong Rengregre ha kawei ka kali Bolero pick-up ban leit thied ïa ki ‘rubber sheets’, lai ngut ki runar bym lah ban ithuh kiba la rah ryngkat ki pistol shna hi, ki la khang kdong ïa ka kali jong u hapdeng surok. Hadien kane ki la shoh ïa u nongñiah kali jong u bad ruh ïa uwei pat bad hadien kata ki la lute ïa ka pisa kaba long haduh T.2.15 lak na ki.
Ha kaba ïadei bad kane, na ka liang jong ki pulit hadien ba ki la ïoh ka jingujor, ki la pynlong ka jingtohkit na ka bynta ban thwet ïa ki runar kiba donkti ha kane ka kam.