Shillong, Nohprah 16
U Myntri ka Sorkar Jylla, u Rakkam A Sangma u la ong ba ka jingtuklar kino-kino ki kynhun niam kim ju byrngem bad kim dei kita ki kynhun ban byrngem. U la ong ruh ba kam mut ba tang lada leit mane blei ha krem Maw-jymbuiñ, Mawsynram kin ïoh jingkyrkhu.
“Ka niam ka dei na ka bynta ka jingsuk. Ngi mane ïa u Blei na ka bynta ka jingsuk jingkmen, bad kum ka kynhun niam kan shu byrngem kam long kaba sngewtynnat ban ïohsngew”, u la ong.
U la ong ba kane ka dei ka mat hapoh kane ka Jylla Meghalaya bad ki dei ban burom ïa ki jingsngew jong ki paidbah kane ka Jylla. U la ong ruh ba da kata ka jingleit mane blei ha Mawjymbuiñ kan ym wanrah jingpher haei-haei ruh.
“Ban leit mane kam mut ba tang lada ki leit mane ïa u blei ha Maw-synram kin ïoh jing-kyrkhu, em. Lada phi kwah ban mane blei shisha mane ha ïing, mane shajan shnong jong phi, phi don ki mandir baheh baheh ha Assam bad hajan ïing jong phi”, la ong u Rakkam.
Lah ban kdew ba ka seng Hindu Kutumba Surakshya Parishad (KSP) ka la ai por 10 sngi ïa ka Sorkar Meghalaya ban plie biang ïa ka krem Mawjymbuiñ ban leit lehniam ki Hindu. Ka KSP ka la byrngem ruh ba lada ka Sorkar kam plie noh ïa kane ka jaka ban lehniam shwa ka Khristmas, kane ka seng kan pakhang ïa ki surok ba kongsan sha Meghalaya ba kynthup ha Jorabat (Guwahati) bad Paikan (Goalpara).
Kane ka kynhun ki Hindu ka la kynnoh ruh ïa ka Sorkar Jylla ba kam shym la leh eiei halor ki jingbthah jong ka ïing kashari Meghalaya High Court ban pynbeit ïa kane ka kam lyngba ka jingïakren bad ki kynhun bapher-bapher.
Lah ban pynpaw hangne ba ka kynrum-kynram halor ka krem Mawjymbuiñ ha Mawsynram, kaba jngai kumba 60 km na Shillong, ka la ïaid mynta la katto katne bnai, hadien ba ki Hindu ki ngeit ba u mawshun ba don ha kane ka kren u dei u blei Shiva. Hynrei, naduh ka 6 tarik Nailar 2024, ka Dorbar Shnong Mawsynram ka la khang ïa ka jinglehniam hapoh jong kane ka krem.
