Na jingkieng Umïam ïaid ki kali kit skum kba, hap bunkam ban thew ïa ka jingjrong

Shillong, Nohprah 16

Ka jingïaid ki kali kit skum kba kiba kit palat pud ka la long ka jingpynthut ïa kiwei pat ki kali ha surok. Kine ki kali kiba kit palat pud ki pynjulor ruh ïa ki sainar ilektrik kiba pynpur na shiliang sha shiliang jong ka surok khamtam eh ha ki surok shnong.

Man la u snem, ynda la poi ka aïom tlang ki kali ki ju kit skum kba ban aibam ïa ka masi kumjuh ruh ban pyndonkam ha ka kam rep bad ka thung ka tep.

Ha jingkieng ba den ïa ka pung Umïam, bun ki kali kit skum kba khamtam ki kali pick up ki la ïaid lyngba kane ka jingkieng ha kaba ki don ki kali ki bym ïoh ban ïaid namar ka jingjrong jong u skum ka la palat ïa ka jingker kaba la pynïeng ban khanglad ïa ki kali kit palat pud.

Ki don ki kali kiba la leit thew shwa ïa ka jingjrong jong ka jingker kaba la pynïeng ynda la poi ha jingkieng.

Ka jingïaid ki kali kit skum kba khlem da tap ka long ruh ka jingma namar kine ki kali ki jynrat naphang ïa ki waïar bad ïa ki sainar ilektrik kiba pur na shiliang sha shiliang jong ka surok.

Ki kali kit skum kba kiba khlem tap tarpaulin ki wanrah ruh ka jingbym khuid namar ki lyngkhot skum ki hap ha shilynter surok bad pynjaboh ïa ki surok shnong wat hadien ba la dep ban pynkhuid shnong.

Ki don ki jaka ha kaba kine ki kali kit skum ki buh jingma namar u skum u lah ban kemding khamtam lada jynrat ïa ki sainar ilektrik. Kane ka pynlong ruh ïa ki nongshong shnong ban sheptieng ïoh jia ka jingpluh.

Bun ki nongshong shnong bad kumjuh ki nongpynïaid shnong ki la kyrpad ïa ki bor district kiba dei khmih kyrpang na ka bynta ka jingshngaiñ ka leit ka wan ban leh eiei khamtam ban maham bad pynshitom ïa kine ki kali kit skum kba kiba kali kit palat pud.

Dei ruh ban bthah ïa ki ban tap tarpaulin najrong bad baroh kawei ka bynta jong ka kali khnang ban ym buh jingma ïa kiba ïaid bad ïeng.