
D H Kharkongor
Nga ngeit kiba bun, ki khynnah skul, ki la ïa ïoh ïa ka ‘result’. Nga ngeit la jan baroh baroh ki la ïa ‘kiew klas’. Kumta ym artatien ba ka jingkmen bad ka jinghun mynsiem ka long tad haduh ki kmie ki kpa ki jong ki, khlem da klet ruh ïa ki nonghikai. Lehse, katto-katne ki dang ïoh mynta ka taïew. Ka jingjahthait namar kata tad haduh ïa ki nonghikai skul lem bad ki nongpynïaid skul. Ka kabu ban pynleit jingmut beit noh ïa ka ‘Christmas’, naba kam slem shuh.
Ka ‘Christmas’ kam slem shuh. Ngi don satang shitaïew ba ngin ïa pynkhrehpynkhrum,tad naduh nabar tad haduh hapoh ïing, na ka bynta ka sngi ‘Christmas’. Kane namar kata ka dei ruh ka taïew, ïa kiba bun ki shnong ki thaw, ba kin ïa pynkhuid shnong. Ka jingpynkhuid shnong kaba shisha ïa ki shnong ki thaw kiba shabar u pud u sam jong ka Sor Shillong. Hynrei ïa ki shong kiba hapoh u pud u sam jong Sor Shillong ka ju dei pynban tang ka jingpushara pynitynnad ïa ki kynroh shnong. Kaba katno tam ïa ki shong ki bym dei ka lynti ïaid lyngba ïa kiwei kiwei pat de ki shnong.
Kane ka dei ruh ka taïew ba kiba bun kin pyndep lut noh ïa ka jingleit wad bad thied riam thied beit. Te ha kaba ïadei kyrpang bad ka riam ka beit, kaba baroh shirynïeng, kane kan dei ka taïew ka ban thnem bha ka ïadei-ïathied. Kiba kham don kham em kin ïabeh sha ka ïew Khyndai Lad, kata sha ki dukan kiba heh bad kham kynsai, na ka bynta ki mar ki mata kiba kham kynsai. Kiba kham duna ka ïoh ka kot ki pynhun ïalade da kiei-kiei kiba ki lah ban ïoh na ïewduh. Ar sngi shwa jong ka Christmas pat de kin sa ïa bunkam ha kaba ïabeh kyrpang ïa ki mar bam mar dih.
Kane ka taïew ka dei ka kabu ksiar ïa ki samla lud kiba smat kiba sting. Ki samla lud kiba kloi ban trei, khlem da lehraiñ, met bad mynsiem ïa kano-kano ka jaitkam. Ki samla lud kiba ki kmie ki kpa ki la hikai ba kin trei kin ktah ïa kat ki kam ki jam, kiba kat kum ka kyrta lem bad ka bor met. Kiba ki kmie ki kpa ki da myntoi shisha, kata, kum ki khun shynrang bad kum ki khun kynthei. Kane namar kata ka dei ka kabu ïa kiba kin ïoh lem, hadien ba la sdang ka shuti tlang, ïa la i jong i kamai kajih ne ba kin ïohlad ban lum bad kynshew pisa. Ka long shisha kumta la ïa ki shynrang ne ïa ki kynthei, kiba ki kmie ki kpa ki jong ki kim shym la pynkjeh hor-hor lane pynsarong biej. Kane ka bynta ka pynkynmaw ïa nga ïa ki snem jong ka jingkhreh kynjoh sha ka jing-long samla lud. Ki snem jong ki ing-dieng bad ki ing-tnum ba sop da ka tin ne ki ‘Assam type structure’. Ki snem jong ki atoskhana ba mih ka tdem dewïong tang shu mar ïa sdang ka prem-mied. Ka por jong ki ‘paiñkhana’ kiba dang ïeng marwei khlem da ïasnoh bad ka ïing shong ïing sah. Ki snem jong ki dieng sohniamtra, ki kper piskot bad ruh ki siej Naga. Ki por mynba dang heh dang ïar naduh ka khmat ïing ne ka phyllaw ïing. Ka por ba dang shu sdang paw ki ‘Akai’, ki ‘Panasonic’, ki Sonodine’, kata, ki kor pynsawa jingrwai ne ki ‘music system’. Ka por ba dang sdang shwa da ka ‘Black & White Television’.Ka por jong ka ‘Uptron’ bad ka ‘Keltron’. Ka por ba dang hap ban ïa pynïeng kham sha jrong ïa ki TV antenna.
Kumta ki shynrang ki ïoh kamai da kaba ki leit ñiad rong bad pushara pynitynnad ïa ki ïing dieng nalor kiwei kiwei da ki jaitkam. ïa ka tnum bunsien da ka rong saw, kata, hadien kaba shut pynkhuid bha da u brut ‘ñiuhnar ïa baroh ka sarong. ïa ki dieng da ka rongïong bad ïa ki byiar pat de da kaba pushara beit thik tang da ka shun. Kumta ka dang dei ka por jong ka ‘Black Japan’ lem bad ka ‘Wood Oil’. Ka ‘Wood Oil’ kaba kum u dewïong bad kaba hap ban shet pynum lem bad ka umphniang sharak. ïa ka ‘Black Japan’ ym donkam ban da shet kyrpang bad kaei-kaei ruh. Kata ka dang dei ruh ka por jong ka shun lem bad u ‘Robin Ultramarine’. Ka por ba dang ïa tynkai bha ïa ka ‘tin’ thep umphniang-bam. Ka por jong ka ‘Shalimar’, kata, ka ‘Mustard Oil’. Ka dang dei ruh ka por ba dang ïa kiew tnum beit thik tang da ka jingkieng kaba da u siej. Ka dang dei ruh ka por kaba shwa ban duh noh ki byrni ïuhkjat, ki lyngknot dieng, ki pliang ‘enamel’ lem bad ka dpei. Ka por kaba ki mar rnong ki dang phuh-phieng naduh ïa ka ïingshet ja tad haduh ïa ka kamra shongkai. Ka dang dei ka por jong u shylliah lem bad u tlieng wat haba la ïa tip ïa ka ‘linoleum’ bad ki ‘rug carpets’. Ka por ba dang kynrei ki tusok kiba da u ‘ñiuhkseh lem bad ki syngkhlieh kiba da u ‘rui’. Ka por ba kiba bun ki dang ïabuh tynkai bha khop ïa ka ‘lantern’ ne ka lynten. Ki kynthei namar kata ki ïoh kamai da kaba ïarap pynkhuid ïing pynkhuid sem bad pynkhuid phyllaw. Kim lait na kaba sait ïing bad kaba ñiad mombati ne ñiad ‘mansion polish’ ïa ki lyntang, kata, ha shwa ba kin shut pynphyrnai ïa ki. ïa u mombati hap ban shet pynum lem bad ka umphniang sharak. Ki ïoh kamai ruh de da kaba leit sait pynkhuid ïa ki ïit bad ruh da kaba ki shut pynphyrnai ïa ki mar rnong. Kumta ka dang dei ka por jong ka ‘Collin’ bad ka ‘Brasso’.
Ka Christmas kam slem suh. Ngi don por satang kumba shitaïew. Ka ‘New Year pat ruh tang shitaïew hadien jong ka Christmas. Shen wat ïa une u 2024 ruh yn sa iehnoh shadien.