Jowai, Nohprah 16
Hadien ka jingduh jingkyrmen na ka jingjulor jong ki pynthor kba na ka daw jong ka tuid ki maw ki shyiap lyngba ka Liar Pamkam na ka jingshna ïa ka surok Jowai By-Pass, ki nongrep ka Pynthornein ki la phuh samrkhie hadien ba ka tnat PWD ka la pynbna ban siew ïa ka bai lutksan jong ki nalor ban pynkhuid ruh ïa ki maw ki shyiap.
Ka tnat PWD ka la sdang ïa ka jingpynkhuid ha ka 16 tarik Nohprah ha ka jingsakhi lang ki trai hali, ki nongrep kumjuh ki ophsiar ka tnat kynthup naduh u Bah H Nengnong, Executive Engineer Jowai Central Division, u Ma O Thubru, Asst. Executive Engineer PWD NH Sub-Division Jowai, u Ma S Challam, Junior Engineer NH Sub-Division Jowai bad Ma A Lipon, Sectional Assistant NH Sub Division Jowai.
U Asst. Executive Engineer PWD NH Sub-Division Jowai Ma O Thubru haba kren sha ki lad pathai khubor u la ong, ka tnat naduh ba jia kane ka jingjia ïa ki nongrep ka la pyrshang ban ïakren na ka bynta ban pynkhuid bad siew bai lutksan bad na ka liang ki nongrep ruh ki la mynjur ïa kane ka jingtyrwa.
U la ong ba ka jingpynkhuid ïa ka Liar Pamkam la sdang shibnai mynshwa, hynrei hapdeng ka jingpynkhuid ka la don ka jingbym ïa sngewthuh jingmut hapdeng u waheh shnong ka Khliehtyrshi bad nongrep kumjuh ki trai jaka bad la hap ban pynsangeh noh shipor ïa ka jingpynkhuid bad hadien ba la poi sha ka jingsngewthuh jingmut ka jingpynkhuid ka la sdang biang.
U la pyntip ruh ba ka PWD ryngkat ka Dhar Construction Company kaba pyntrei ïa kane ka surok ki la pyrshang ban wad ki lad ki lynti katba kot la ka bor ban pynïoh jingïarap ïa ki nongrep bad ka jingïarap kan bteng ha ki aiom slap ban wan lada jia biang kane ka jingjia.
Ki nongrep kynthup u Ma Kam Pakynteiñ, ka Kong Middle Pakynteiñ nalor kiwei ki pynpaw ka jingsngewnguh sngewburom ïa ka tnat PWD kaba la shimkhia ban pynïoh ki lad jingïarap sha 11 ngut ki trai jaka kiba la mad na ka jingshah ktah. Ki la pyntip ruh ba halor ki jingïarap ki la dep ban ïasoi soskular bad ka tnat PWD da kaba khmih lynti ba kum kine ki jingshah ktah kin ym jia shuh ha ki sngi ki aiom ba wan khnang ba kin ïoh ban rep ban ot man la u snem.
