Shwa ka Khristmas lah ban pynbna kyrtong shuh ka NPP

La ong ba ki don ki konstitwensi kiba khlem pat lah ban jied kyrtong ha ka wat banyngkong yn sa pynbna noh ha kane ka sien kaba mynta.

Shillong, Nohprah 16

Ka National People’s Party (NPP) kaba la dep pynbna teng ïa ki kyrtong ha ka thup kyrteng kaba nyngkong ka lah ban pynbna shuh ïa ka thup kyrteng ka ba-ar shwa ka Khristmas.

La ong ba ki don ki konstitwensi kiba khlem pat lah ban jied kyrtong ha ka wat banyngkong yn sa pynbna noh ha kane ka sien kaba mynta.

Dang shen ka NPP ka la pynbna ïa ka thup kyrteng jong ki kyrtong ki ban ïakhun ha ka ilekshon sha ka Ïingdorbar Khasi Hills Autonomous District Council (KHADC) bad Jaiñtia Hills Autonomous District Council (JHADC) ka ban sa long ha u snem thymmai 2025.

Na ki 29 tylli ki konstitwensi ha KHADC, ka  NPP ka la dep sei 18 ngut ki kyrtong bad la pynbna 29 ngut ki kyrtong na baroh 29 tylli ki konstitwensi ha JHADC.

La ong ba ka NPP ka lah ban pynbna lut ïa baroh ki kyrtong sa ha 11 tylli ki konstiwensi ka KHADC.

Ki kyrtong kiba kham paw ha ka thup kaba nyngkong ki kynthup ïa u Chief Executive Member (CEM) Bah Pynïaid Sing Syiem bad u Chairman ka KHADC, Bah Lamphrang Blah.

U Bah Pynïaid Sing Syiem uba mihkhmat ïa ka Sohryngkham constituency, mynta un ïakhun noh na Nongthymmai constituency.

Na JHADC, kiba kham paw kyrteng ki long u Chief Executive Member (CEM) Bah Thombor Shiwat bad u Chairman ka JHADC Bah Shankey Shangpung nalor kiwei kiwei ki MDC.

Ka jingpynbna ïa ka ilekshon MDC ka lah ban long ha u Kyllalyngkot 2025 ynda la ïoh ïa ka jingmynjur na u Lat ka Jylla.