Jowai, Nohprah 16
Wat la ka dei ka kamram jong ki nongmihkhmat paidbah ban wanrah ïa ka roi ka par sha ki shnong ki thaw hapoh ki konstitwensi jong ki, hynrei ki nongshong shnong kim lah satia khlem da pynpaw jingsngewnguh ïa la u nongmihkhmat paidbah uba la shimkhia ban pynpoi ïa ka roi ka par sha ki shnong.
Kum ka dak ka jing-sngewnguh ïa u MDC, ki ar tylli ki Dorbar Shnong ka Umladkhur bad Thangbuli hapoh ka Jowai South Konsti-twensi, ki la pynkup burom bad ai khublei kyrpang ïa u Ma Saron Paswet uba long u nongmihkhmat paidbah jong ki sha ka JHADC. Ïa ka jingïalang pynkup burom la pynlong ha Hall jong ka Dorbar Shnong Umladkhur ha ka 16 tarik Nohprah ha ka jingdonlang ki nongïalam shnong jong ki ar Dorbar Shnong, ki nongshong shnong kynthup naduh ki longkmie longkpa ki samla nalor kiwei kiwei.
Kine ar Dorbar shnong ki la pynkup burom ïa u Ma Saron Paswet da ka jaiñ Ryndia bad momento kum ka dak ka jingsngew burom halor ki kam pynroi kiba u la wanrah hapoh ki ar tylli ki shnong.
Lah ban kdew ba ha Jowai South MDC Konstitwensi la pynkynriah ïa ki 7 tylli ki shnong kynthup ka shnong Mupyut, Umsalang, Moosakhia, Samanong, Shkenpyrsit, Thangbuli bad Umladkhur bad ïa ka Thangbuli la pynkynriah sha War East katba ïa ka Umladkhur sha War Central.
U Ma Saron Paswet ha ka jingkren u la pynpaw ba u dap da ka jingsngewnguh bad ai ka jingkhublei kaba kyrpang ïa ki ar dorbar shnong halor ka burom kaba kila pynkup ïa u, “Ngam shym la poi pyrkhat ba ngan shah pynkup burom, nga dap da ka jingsngewnguh ba phi la pynkup burom ïa nga namar ki kam ba bha hapoh ki shnong ki thaw ki jong phi” bad bynrap ba kum u nongmihkhmat ka dei ka kamram jong u ban trei na ka bynta ki paidbah ha kine ki 5 snem kiba la leit. Haba u kyrtiang dien ha ka ilekshon MDC 2019, u Ma Paswet u la ïathuh ba ka Umladkhur bad Thangbuli ki pyni shisha ïa ka jingieid jong ki ïa u (Saron) namar ha ki ilekshon kiba la dep, kine ki ar shnong kim ju peit ïa u briew ne seng bad ki peit tang ïa ka Bom, hynrei ha u 2019 ka jingkylla la wan bad ki la jied noh ïa u briew uba lah ban ïarap bad wanrah shisha ïa ka roi ka par hapoh shnong poh thaw.
“Nga panmap ïa kiba ngam lah ban ïarap bad khublei shibun ïa kiba la ïarap ïa nga” la ong u Ma Paswet da kaba pynpaw ruh ka jingsngewdiaw halor ka jingbym ïohlad shuh ban ïa don bynta lang bad ki hynñiew shnong ha kane ka ilekshon MDC ban wan.
Ban pynskhem ïa ka jingieid jong u ïa ki hynñiew shnong, u Ma Saron u la ong ba un ïakhun ha kane ka ilekshon ban wan bad lada u jop ne rem, ka jingieid jong u ïa ki nongshong shnong kan ïaineh ïaisah junom la junom da kaba kular ruh ban ïadon bynta ha kano kano ka por kaba ki donkam ïa u.
U la kyntu ruh ïa ki baroh ki paidbah jong hynñiew shnong ban ai jingïatreilang bad uno uno u nongmihkhmat u ban jop na kano kano ka konstitwensi kaba ki don.
Ïa ka jingïalang pynkup burom la pynïaid da u waheh shnong barim ka Umladkhur Ma Wanri Khyriem bad la ïoh ka jingkren lyngkot na u Ma Rimon Lyngdoh Waheh shnong Umladkhur, Ma Yoolang Buam Assistant Waheh Shnong Thangbuli nalor kiwei kiwei kiba la pynsngew ïa ki kam pynroi kiba u MDC u la wanrah na ka bynta ka bha ka miat bad ka roi ka par bapher bapher jong ki shnong.