
Shillong, Nohprah 16
Ka Hynñiewtrep Youth Council (HYC) ka la pynpaw ïa ka jingsngewkmen halor ka jingdon jong ka lympung jong ki Kaitor na kylleng ka Bri u Hynñiewtrep ka ban long ha ka 20 bad 21 tarik Nohprah, 2024 ha Krissimai Mini Stadium, Smit. Kine ki Kaitor jong ka Jaidbynriew kin ïoh ban pyni bad pynsngew ïa la ki sap tem sap put bad ki sap rwai sap siaw bad khamtam eh ha ka ktien Nongmei Nongpa.
Kumta, ka HYC ka khot ka wer bad kyrpad ïa ki para ri ba kin ïa ai ka jingkyrshan da kaba leit ban sakhi bad kyrshan ïa katei ka lympung “KYNTIEW IA LA KI JONG MUSIC FESTIVAL” ha kitei ki sngi ba la kdew haneng, khnang ba kine ki Kaitor ka Jaidbynriew kin ïoh mynsiem ban nang trei shitom bad shitrhem ban pynmih ïa ki sur tem sur put bad ki sur rwai sur siaw ha ka ktien ki Nongmei Nongpa.
“Hooid, ym baroh na ngi, ngi nang ban put ban tem ne ban rwai ban siaw hynrei ka seng ka ngeit skhem pat ba ngi nang ban sngap, ngi lah ban ai mynsiem bad khamtam eh ba ngin long kiba kloi ban kyrshan ïa la ki jong,” ong u President ka HYC u samla Roykupar Synrem.
“Kumba ong ka Ktien ‘Burom ïa jong kiwei, Sarong ïa la Kajong’. Ngi ngeit ruh ba kumba ngi burom bad kyrshan ïa ki Nongput Nongtem na kylleng ka pyrthei kiba wan ban ïuhkjat ha kane ka ri kaba ieit ka jong ngi. Kumta, ruh ngin sngew sarong bad kyrshan khamtam eh ïa la ki jong bad ïa la ka ktien ka thylliej ki Nongmei Nongpa ki jong ngi da kaba ngi ïa mih ban ai mynsiem bad sakhi ïa katei ka lympung ki Kaitor ka Jaidbynriew,” la bynrap u President HYC.