Shillong, Nohprah 16
U Myntri ka tnat Pule-Puthi ha ka Jylla, Rakkam A Sangma u la ong ba ka jingpynbna ba ki nonghikai ki donkam ban pyndep ïa ka Meghalaya Teacher Eligibility Test (MTET) ka dei katkum ka jingbthah jong ka tnat Pule Puthi ka Sorkar Pdeng.
Kane ka jingkren u Myntri ka long hadien ba ki nonghikai SSA hapoh ka Jylla ki la pynpaw ïa ka jingkwah ba ka Sorkar Meghalaya kan pyllait noh ïa ki nonghikai kiba la sdang ban trei shwa u Naitung 2020, na ka jingdonkam ban pyndep ïa ka MTET.
U la ong ba ka MTET ka long kaba kongsan tam na ka bynta ban long ki nonghikai, ha kaba u la pynpaw ruh ba ki nonghikai kiba la don lypa ha ka kam kim donkam shuh ban leh ïa ka MTET, bad ki lah ban bteng beit ïa ka kam, katba ïa kito kiba kwah kam hikai ka la ïaid da kumwei.
“Na ka bynta kito ki nonghikai kiba la don lypa ha ka kam, ka jingkylli kam mih ban hap ïakhun eksamin MTET, hynrei ka MTET ka dei na ka bynta kito kiba kwah kam hikai thymmai”, la ong u Rakkam.
U la ong ba ka jingpynlong ïa ka eksamin MTET ka dei katkum ka jingbthah ka Sorkar Pdeng lyngba ka National Council for Teacher Education (NCTE).
Halor ka jingdawa ki nonghikai SSA ban thung noh da ka Empowered Committee, u Rakkam u la ong ba ka Jylla ka la don lypa ïa ka State Education Commission (SEC) ban bishar ïa ka Pule Puthi hapoh ka Jylla, bad bynrap ba kam donkam shuh ban thaw ïa ka Empowered Committee.
“Ngi la don ïa ka State Education Commission kaba bishar bniah ïa ka Pule Puthi hapoh ka Jylla, la ka dei ïa ki nonghikai SSA ne kiwei ki nonghikai, ki skul, ki kolej. Ka SEC ka dang pynkhreh ïa ka kaiphot bad kan sa aiti sha ka Sorkar Jylla ban shim ïa ki sienjam”, u la ong.
U Myntri u la ong ruh ba lada thaw ïa ka Empowered Committee kin dei kijuh ki ophisar, ujuh u Myntri Rangbah, ujuh u Myntri Pule Puthi ki ban don ha kata ka Committee kiba la tip lut halor ki jingdawa bad jingdonkam jong ki nonghikai.
Ha kajuh ka por u Rakkam u la ong ba ka Sorkar ka la tip bha ïa ki jingeh jong ki nonghikai Samagra Shiksha Abhiyan (SSA), kumta ka dang thaw ïa ki lad ki lynti bad kam lah ban shim rai kyrkieh khamtam ba ka jingeh ka dei na ka jinghiran ka ïarong pisa bad ka jinglut ka long kaba bun.
