Nongstoiñ, Nohprah 17
Ka Joint Action Committee (JAC) jong ki lai polling station ba kynthup ïa ka Misei, Langdongdai bad Mawsmai, kiba kynthup ruh haduh arphew wei tylli ki shnong, ha ka Sngi Ba-ar jong ka taïew ki la shim ïa ka rai ba ha ka 19 tarik u bnai Nohprah 2024 kaba dei ruh ka sngi sdang jong ka dorbar tlang ka KHADC, kin leit ap ïa ka rai hakhmat ka khyrdop ka Khasi Hills Autonomous District Council bad kyrmen ba yn ïoh ïa u soh bathiang kumba ki la kwah bad thrang ban neh bad don beit hapoh ka Mawshynrut Konstitwensi.
Ki nongïalam ka JAC ki la ong ba halor kane ka phang ha ka 17 tarik u bnai Nohprah 2024, ki la ïoh ruh ban ïa shong ïa ka executive committee kaba kyrkieh ha ka Dorbar Hall Misei polling station.
Shuh shuh na ka liang jong ka JAC lyngba ki nongïalam ki jong ka, ki la ai khublei ïa u Bah PN Syiem uba dei u Deputy CEM bad u Chairman ka Selection Committee ba u la rah shisha ïa ka jingdawa ban pynphai biang ïa ki 21 tylli ki shnong ba kynthup lai tylli ki polling station na Rambrai Jyrngam Konstitwensi sha Mawshynrut Konstitwensi.
“Ka JAC ka buh hakhmat ïa ki 30 ngut ki MDC ka KHADC kiba dei ki paradoh parasnam ban kyrshan lem ïa ka jingdawa ki paidbah jong ki 21 tylli ki shnong ban pynphai biang na Rambrai Jyrngam Konstitwensi sha Mawshynrut konstitwensi ha ka dorbar tlang ka KHADC ka ban sa shong ha ka 19 tarik Nohprah 2024,” ong ki nongïalam ka JAC.
Ka JAC jong 21 tylli ki shnong ka buh ka jingkyrpad khamtam ïa ki MDC ka thaiñ ba kynthup ïa u Bah Gigur Marthong bad u Bah Bajop Pyngrope kumjuh ruh ïa baroh ar ngut ki MLA ka thaiñ u RG Momin bad u Bah Methodius Dkhar lada don ka lad ka lynti ban pynphai biang ïa ki 21 tylli ki shnong na Rambrai Jyrngam konstitwensi sha ka Mawshynrut konstitwensi.
Shuh shuh ka JAC ka buh ruh ka jingkyrpad sha u nongïalam ka liang pyrshah bad ki liang pyrshah baroh ban kyrshan pynphai bad pynneh biang ïa ki 3 tylli ki PS kiba don 21 tylli ki shnong ha Mawshynrut Konstitwensi.
Kum ban pynkynmaw ba ki 21 tylli ki shnong na 3 tylli ki polling station ki la pynlong ïa ki jingïalang paidbah ha ki 3 tylli ki PS ban pynsngew ïa ka sur pyrshah halor ka jingpynkynriah jubor ïa ki 21 tylli ki shnong na Mawshynrut konstitwensi sha Rambrai Jyrngam konstitwensi.
Nangta, ka JAC ka la leit ban ai da ka dorkhas sha u Dy CEM Bah PN Syiem bad ha u Bah Pynïaid Sing Syiem, CEM ka KHADC.
Shuh shuh ka JAC ryngkat ki paidbah jong 21 tylli ki shnong ki la leit ban tied ruh ïa ka jingkhang ka KHADC ban sngap ïa ka jingdawa ban pynphai biang ïa ki shnong sha Mawshynrut konstitwensi.
