Nongpoh, Nohprah 17
Kumba saw ngut ki briew ki la duh ei la ka jingim hadien ba kawei ka trok kit dieng kaba ki shong ka la hap ha kawei ka riat bah jong ka surok khlaw kaba dang hap ha ka shnong Mynnar Jirang jong ka thaiñ Patharkhmah ha Ri Bhoi District.
Kitei saw ngut kiba la khlad noh ki kynthup ïa u Bah Edward Nongkhlaw, Teilor Nongphlang bad u Francis Warjri na ka shnong Iewsohksang bad u Bah Bankerlang Khyllait na ka shnong Jirang Center Village.
La ïoh jingtip ruh ba uwei pat uba dang lait im ha kane ka jingjia, ïa uba la tip kyrteng kum u Benedic Syiem, u dang don hapdeng ka jingshah sumar ha nongbah Shillong.
Katkum ka khubor ba la ïoh lum, la ïathuh ba katei ka trok kit dieng, ka la hap sha ka riat bah kaba jylliew kumba 200 meter eiei hadien ka jingwanphai na khlaw bad thmu ban pynpoi ïa ki dieng sha ka jaka ot-dieng.
Ïa ka met jong kitei saw ngut kiba la khlad noh ha katei ka jingjia la wanrah sha Civil Hospital Nongpoh na ka bynta ban pyndep ïa ki jingdonkam katkum ki kyndon aiñ bad na ka liang ki bahaïing ruh ki la wan poi ha Nongpoh ban shimti ïa ka met kaba sah jong kitei ki rangbah na ka bynta ban pyndep ïa ka jinglehniam khatduh.
Halor katei ka jingjia, u MLA ka Jirang konstitwensi, Bah Sosthenes Sohtun u la wan mih dalade ban kynduh ïa ki bahaïing jong kitei kiba la khlad noh bad ban kren ruh sha ki bor pynïaid hospital jong ka Civil Hospital Nongpoh ba kin pyndep kloi ïa ki jingdonkam baroh bad ruh ban pyllait ïa ka eksamin post-mortem kumba la kyrpad da ki bahaïing.
