Shillong, Nohprah 17
Ka Sorkar Jylla lyngba ka tnad pule-puthi ka la pynkhreh ïa ka ‘Detailed Action Plan’ (DAP) haba ïadei bad ki sienjam na bynta ka jingpynskhem kam ïa ki nonghikai SSA.
“Ki la pynkhreh ïa ka DAP bad ïa kane kajuh kin sa wanrah la kumno-kumno ha ka 10 tarik u Kyllalyngkot, 2025 hakhmat ka Sorkar,” ong u President ka MSSASA, Bah Aristotle C. Rymbai haba kren sha ki lad pathai khubor hadien ka jingïalang bad ka tnad pule-puthi ka Sorkar Jylla hapoh ka jinglamkhmat u Commissioner & Secretary, u Vijay Kumar Mantri.
U la ïathuh ba ha kane ka sngi kin sa don lang ruh ki dkhot jong ka Kynhun Myntri bad ïa kane ka DAP yn sa rah hakhmat ka Sorkar ban ïoh ïa ka jingmynjur ban ïaid shakhmat haba ïadei bad ki sienjam ban pynskhem ïa ka kam jong ki nonghikai SSA.
“U Commissioner & Secretary u la pdiang sngewbha bad pynpaw ka jingkmen halor ka rai ki nonghikai SSA ban weng noh ïa ka jingïakhih bad ban bteng ïa ka jingïakren bad ka Sorkar,” ong u Bah Rymbai.
Halor ka jingai jingmut ban pyllait na ka ban pyndep ïa ka MTET ïa baroh ki nonghikai SSA kiba la don lypa ha ka kam ne kiba pynïasoh ha lane shuwa ka 1 tarik u Naitung, 2020, u President u la ïathuh ba na ka liang u Commissioner & Secretary u la ong ba ka tnad kan sa pan jingmut na u Advocate General haba ïadei bad kane ka bynta bad un sa pyntip sha ki ha ka jingïalang ka ban wan.
“U la kren shai sha ngi ba lada kam don kano-kano ka jingthut haba ïadei bad ka aiñ, ka Sorkar kan long kaba kmen ban pyllait ïa baroh ki nonghikai SSA ba la pynïasoh ha lane shuwa ka 1 tarik u Naitung, 2020 kumba la pynmih jingpynbna da ka Sorkar ba ka MTET kan long kongsan naduh ka 1 tarik u Naitung, 2020 shaneng,” u la ong.
Ha kawei ka liang, haba phai sha ka jingai jingmut ïa ka Sorkar ban thaw noh ïa ka ‘Empowered Committee’, utei u nongïalam u la ïathuh ba ki dkhot kiba ïadonlang ha kane ka sngi ki la ïa mynjur ban don noh ïa kane ka komiti bad u Commissioner & Secretary ruh u la sngew ïahap ïa kane ka bynta.
“U Commissioner & Secretary u la pyntip ruh ba shen, na ka liang ka tnad pule-puthi kan sa pynmih ïa ka jingpynbna haba ïadei bad ki kam kiba sah thylli kumba la pyntip da u Myntri ka tnad pule-puthi ha kine ki khyndiat sngi,” ong u Bah Rymbai.
Shuh shuh u la ïathuh ba utei u ophisar ka tnad u la pyntip ruh ba ïa kito ki nonghikai kiba la pyndep ïa ka ‘D.El.Ed’ na ka NIOS jong ka ‘batch’ 2017, 2019 ne ki ‘online’ D.El.Ed’, ka Sorkar ka la shim ïa ka rai ban pyrkhat bad ai lad ïa ki ban thep ïa kine ki kam kaba ka Sorkar kan sa pynbna bad kin hap pyndep ïa ka eksamin MTET.
Ha kane ka sngi la ïadonlang ruh ki dkhot na ka AMSSASTA bad All Meghalaya 4th Teachers Association.
