Shillong, Nohprah 17
U Cardinal George Jacob Koovakad ha ka Sngi Ba-ar u la ong ba ka jingwan jngoh jong u Pope Francis sha India ka lah ban long hadien u 2025, ïa kaba la pynbna kum ka ‘Jubilee Year’ da ka Balang Katholik, namar ki jingrakhe ha Rome ha uta u snem.
U Koovakad, 51 snem ka rta, u la shah kyntiew sha ka kyrdan ‘Cardinal’ ha u Pope Francis ha ka 7 tarik u Nohprah. Ha ka jingwan jong u sha Kerala ha ka Sngi Ba-ar, u la ai khublei ïa baroh kiba la wan ban ai khublei ïa u ha kad liengsuiñ (International) Cochin.
U la ong ruh ba u kynmaw sarong ïa ki jingduwai jong baroh, ka jingieid bad ki jingkyrkhu na bynta jong u.
Haba kylli halor ka jingwan jngoh jong u Pope, u la ong ba kam da shai lano u Pope Francis un wan sha India.
“Ki lad ki long ba kane kan long hadien ka 2025 kaba dei ka ‘Jubilee Year’. Ki don bun bah ki jingrakhe ha Rome naba ka dei ka ‘Jubilee Year’ bad kumta, u Pope u lah ban don hangtei ha katei ka snem,” u la ong sha ki nongthoh khubor ha kad liengsuiñ.
Ha kajuh ka por, u la ong ba ka jingwan jngoh jong u Pope ha kine ki snem ban wan ym lah ban kyntait.
“Ngi lah ban khmih lynti bad duwai na bynta kane,” u la ong.
U Koovakad u long uwei napdeng ki 21 ngut ki Cardinal thymmai kiba la shah pynrung na ki ri bapher-bapher ha ka jingïalang bah kaba la long ha St. Peter’s Basilica bad la ïashim bynta da ki ‘Clergy’ bad ki heh ki haiñ na kylleng ka pyrthei ha ka 7 tarik Nohprah.
U Koovakad na ka Jylla Niam Bah Changanassery ha Kerala – ka jingshah thung ‘Cardinal’ jong u, ka la kyntiew ïa ka jingdon jong ki Cardinal na India sha ka 6 ngut, kaba la nang pynkhlaiñ shuh-shuh ïa ka jingmihkhmat jong ka ri sha Vatican.
Ki don 253 ngut ki Cardinal ha ka Balang Katholik bad na kine, 140 ngut na ki, ki long kiba la bit la biang ban jied ïa u Pope ban wan. U Koovakad u la don bynta ha ka ban pynbeit ïa ka leit ka wan bar-ri jong u Pope Francis naduh u snem 2020.
Hashuwa, u Koovakad, uba long kum u Monsignor, u la shah pynbna kum u Titular Archbishop jong ka Nisibis ha Turkey. Ïa mynta u don ha Vatican.
