Shillong, Nohprah 17
Ki nongtrei Muster Roll kiba don hapoh ka shatri jong ka All Jaiñtia Muster Roll Workers & Labour Union hadien ba ki la dep pynbna ha ka 3 tarik u Nohprah, 2024 lyngba ki lad pathai khubor ba kin sa mih madan ban pynlong da ka jingïakhih kaba tyngeh lada ka Sorkar Jylla kam lah ban pynkiew ïa ka jingsiew Variable Dearness Allowance ïa kaba ka Sorkar ka la dei ban pynkiew naduh ka 1 tarik Risaw 2024 kumjuh ruh ïa ka Basic Floor Rate kaba dei ban kyntiew shisien san snem naduh ka 1 tarik Risaw, 2023 katkum ka Minimum Wage Act, 1958.
Hynrei wat hadien ba ka seng ka la mih shakhmat ban pynbna bad byrngem lyngba ki lad pathai khubor ban kan sa pynlong da ka jingïakhih shong shah thngan ha madan kum shibynta ban dawa na ka Sorkar Jylla ba kan shimkhia ïa ka kam jong ki ha ka ban kyntiew ïa ka bainong jong ki hynrei kat haduh kine ki sngi ruh kam pat shym la don satia kano-kano ruh ka jingthoh na ka Sorkar.
Kumta, ha ka 17 tarik u Nohprah, 2024 kane ka kynhun jong ki nongtrei Muster Roll ka la mih da ki spah ngut ha madan Malki ban pynlong da ka jingïakhih ka ban sdang naduh ka Sngi Ba-ar jong ka 17 tarik u Nohprah tad haduh ba ka Sorkar kan ai da ka hukum ba kin sa lah ban weng noh ïa ka jingïakhih jong ki.
Haba ïoh ban ïakren bad ki nongïalam jong kane ka kynhun, ki la ong ba ki la ap naduh ka Sngi Nyngkong kata ka 16 tarik u Nohprah, 2024 ban ïohpdiang ïa ka hukum namar ba ka Sorkar ka la pynbna ba kan sa pyllait ïa ka hukum hapoh ka 7 baje. Hynrei tad haduh ba kitei ki nongtrei ki la rai ban mih sha madan ruh ban pynlong ïa ka jingïakhih ruh, kim pat shym la ïoh satia ïa kano-kano ka hukum, kumta ki la shim beit noh da kane ka sienjam ban ïa mih paidbah noh ha madan Malki bad ong ruh ba kin sa don sa kiwei pat ki nongtrei Muster Roll ki ban wan ban ïashimynta lang ha kane ka jingïakhih.
Na ka liang ka Kong Wegetwell Rumuit, General Secertary ka kynhun, ka la ong ba katkum ka aiñ, ka Sorkar ka dei ban pyllait ïa ka bainong jong ki nongtrei manla ka 5 snem kaba dei ka Basic Floor Rate bad ong ba katkum ka jingïaid lynti jong ka seng, ka la leit ban buh da ki jingthoh na ka por sha ka por ban pynkynmaw ïa ka Sorkar ba kan pyntreikam noh mardor ïa ka jingdawa bad ban ai noh ïa ka hok jong ki nongtrei Muster Roll.
“Ka jingïaid lynti jong ngi ka la kot sha ka 6 snem bad 4 bnai bad ka jingïaid lynti jong ngi ka long kaba eh haduh katta-katta namar ka hok kaba ngi dei hok ban ïoh, ngim pat ïoh haduh mynta”, ong ka Kong Rumuit.
Ka Kong Rumuit ka la ong ba kane ka jinghap ban wan shong ïakhih jong ki nongtrei Muster Roll ha katei ka madan ka dei namar ba ka Sorkar ka la kheiñ sting shaba palat bad kam don satia ïa ka jingkitkhlieh ban peit bad khmih ïa ki barit-baria.
Na ka liang ka Kong Dayoowanphi Ïakai kaba dei ka President jong ka kynhun, ka la ther tyngeh ïa ka Sorkar Jylla da kaba ong ba shaei ka roi-ka par kan kiew hapoh ka Jylla Meghalaya lada wat ïa kiba rit-ba ria ruh kam lah satia ban siew ïa ka bainong kaba ki dei hok ban ïoh ha ka por kaba biang bad ong ba ki nongtrei Muster Roll ki dei kiba rit tam hynrei ki don pat ïa ka jingïaishah kaba shyrkhei.
“Balei ka Sorkar kam lehraiñ? Lada ngi kiba rit tam bad kiba trei hapoh ka Sorkar, phim siew ha ka por kaba biang, hangno keiñ phin ong ba ka Meghalaya kan long kaba kiew shaphrang? Hangno kan don ka roi-ka par, haba phi ïa u barit phim lah ban lah ban siew ha ka por kaba biang?”, ong ka Kong Ïakai.
