New Delhi, Nohprah 17
Ka Ïingdorbar Lok Sabha ha ka Sngi Ba-ar ka la thnam namar ka jingwanrah ka Sorkar Pdeng kaba ïalam da u Myntri Rangbahduh, Narendra Modi ïa ka aiñ rew ‘One Nation, One Election Bill’, ka aiñ na ka bynta ban pynlong ha kajuh ka por ïa ka ilekshon Lok Sabha bad ilekshon MLA ha ka ri baroh kawei.
Ïa kane ka aiñ kaba tip kum ka Constitution (129th Amendment) Bill la wanrah ha Lok Sabha da u Myntri ka tnat Aiñ, u Arjun Ram Meghwal hadien ba la ïaid ka jingïatai la jan kumba 90 minit eiei.
Ha ka jingphiah ‘vote’ hapdeng ki MP kiba kyrshan bad ki MP ki bym kyrshan ïa kane ka Bill, la sakhi ba 269 ngut ki MP ki kyrshan katba 198 ngut kim kyrshan. Namarba la jop ki MP kiba kyrshan ïa ka Bill, kumta la wanrah ïa ka Bill ha Lok Sabha.
Ha kawei pat ka liang, ka BJP ka la phah jingthoh sha palat 20 ngut ki MP jong ka kiba khlem don ha Ïingdorbar ha ka sngi ba ïaid ka jingthep ‘vote’ ban wanrah ïa kane ka Bill.
Ka liang pyrshah INDIA bloc ka pyrshah jur ïa kane Bill bad ka la kdew ba ka Sorkar kam shym la lah ban ïoh ïa ka jingbun paid kaba long ar na lai.
Ïa kane ka Bill la phah noh shwa sha ka Joint Parliamentary Committee (JPC) hadien ka jingïatai ha Parliament ynda la dep wanrah da u Myntri ka tnat aiñ, u Arjun Ram Meghwal.
Na ka liang ki MP ka liang pyrshah ki la pynpaw ba ka jingphah sha ka JPC ka dei kaba biang eh namar ka sur jong baroh ki seng saiñ pyrthei kan sawa.
Ka MP ka Shiv Sena UBT, ka Priyanka Chaturvedi ka la ong ba ka ‘One Nation One Election’ ka long pyrshah ïa ka Riti Synshar, pyrshah ïa ka jingsynshar paidbah bad pyrshah ïa ka bynta kaba dei ka jingdonbynta jong ki Jylla bad ka Sorkar Pdeng.
