Shillong, Risaw 02
U Bah Paul Lyngdoh uba dei u Nongïalam bad MLA ka UDP u la ong ba u la pynsngew la slem halor ka kam nongïalam hapoh ka UDP, hynrei kine ki jingmaham ki jong u ki dei kiba la shah kyntait, kaba la lam sha ka jinghiar na ka jingdon 12 ngut ki MLA sha ka 4 ngut mynta.
Haba kylli la un tynruh ban bujli nongïalam, hadien ba 8 ngut ki MLA ka seng kila phet noh sha ka BJP, u Bah Paul u la ong, “Ka jingdawa ban don ïa ka jingkylla ka dei kaba la ïalam da nga, ha ka ilekshon kaba la dep, kaba la don ka jingïakhun hapdeng ka jong nga bad u Bah Metbah. Ha katei ka por u la jop da 3 vote pyrshah ïa nga namar ba nga dang shu rem ïa ka ilekshon MLA ha u 2013.
“Nga ïai pynsngew ïa ki nongïalam jong ka seng bad nga la kdew beit beit ba ngi donkam ïa uno uno uba don ïa ka jingïohi jngai nalor ka Constituency,” u la ong.
U Bah Paul u la kynnoh ba u President ka seng um dei uba ïar ka rukom pynleit jingmut.
“Phim lah ban don ïa u President ka seng, uba buh hakhmat ban thaw ïa ka District tang ha la ka Constituency bad ïa la u paramarjan, kaba ha katei ka por la mihkhmat da u Bah Brolding Nongsiej. Phim lah ban don ïa ka rukom pyrkhat kaba khim jingmut, kaba tang kawei ka shithi kaba u la soi ka dei na ka bynta ban pynrung ïalade hapoh ka kynhun Myntri,” u la ong.
“Baroh ki jingthung kam ïa ki nongïalam saiñpyrthei (Political Appointee) bad phi lah ban leit kylli na baroh ki MLA, ym shim la don uwei ruh na ki u ban ïoh ïa kano-kano ka jingshah bynshet ïa ka kam ne ‘Political Assignments’ lyngba u President ka party. Don kiba la leit ban tied ïa ka jingkhang jong u Conrad K Sangma, don kiba la leit sha u Bah Prestone. Haba mih kum kitei ki jingjia, balei ngi buh ïa u PP Leader? Kitei ki mat kila nang ïai kynton,” u la bynrap.
“Nga jied ban kren bad ban kdew beit ïa ka mat. Nga la sdang ïa kaei kaba nga dei ban ong, hynrei la kyntait noh da ki nongïalam bad ki nongkitkam bad khatduh khatwai ka seng kala hap ban siew ïa ka dor. Na ka 12 ka ban lah syndon ban poi shaduh 1, kaba long kaba heh tam syndon ka jinghap jong ka UDP,” ong u Bah Paul.
Haba kylli, la u Bah Metbah Lyngdoh u dei ban hiar shuki noh, “Nga tharai kan bha shibun, ba ma u hi un ai ïa ka jubab kaba biang tam halor kane ka jingkylli namar ba u la leh ïa kaei-kaei, kaba u la rai hi bad mynta u kwah ban leh ïa kaei-kaei kaba long pyrshah ïa kaei-kaei kaba u la dep ban leh ne rai”.
