Nongpoh, Risaw 02
Ha kawei ka jingjia ha ka step phyrngap jong ka sngi Thohdieng, kawei ka jaka thep umphniang jong ka Indian Oil Company kaba la tip kyrteng kum ka Highway Refill Centre kaba don ha 10 Mer Ri Bhoi District kala shah pynjulor hadien ka jingtwa kynsan ka khyndew na u lum uba don shadien jong kane ka jaka.
Ha kane ka jingtwa jong utei u lum, kiba bun na ki tiar ki tar jong katei ka jaka thep umphniang kila ngat ha ka jingjulor nalor kawei ka bos kaba la pynïeng sahmiet ha katei ka jaka kaba la ngat lang ha ka jingshah pynjulor kaba malu mala na ka jingshah ban ha ka khyndew.
U Manager jong katei ka jaka thep umphniang, u la ïathuh ba kane ka jingtwa khyndew, nyngkong ka dei shwa malu mala bad ha kata ka por, ki kali ki dang rung bad mih ban thep umphniang bad ki nongtrei ruh ki dang pyndep ïa la ka kamram kumba ju long. U la ïathuh ba dei tad ha ka por kumba 3 baje eiei ba kala don ka jingtwa kynsan kaba jur bad namar ka dei artad ha ka por step, ki kali ruh ki duna bad kam shym la don satia kano-kano ka jingjia ba sngewsih.
