Shillong, Risaw 02
Ka Meghalaya ka la ïoh duna ïa u slap kaba long haduh 60% ha ka aiom lyiur jong u snem 2026 bad kala ïoh pdiang tang 1,077.1 mm u slap na ka jingslap kaba baroh shi katta kaba long 2,695.3 mm, katkum ka India Meteorological Department (IMD).
Kane ka jingduna ka dei kaba la lum jingkheiñ na ka bynta u bnai Jylliew-Nailur kaba dei ka aiom lyiur, ha kaba ka aiom slap kala sdang naduh ka 9 tarik u Jylliew.
Ka jingduna u slap ka dei kaba jia ha kylleng ki bynta jong ka Jylla. Na ki 11 tylli ki District ïa kaba la lum ïa ki jingtip, kila don 7 tylli kiba la jingkheiñ ba kala don ka jingduna slap kaba jur bha, 3 tylli ki dei kiba la shu biang ha ka rukom duna slap bad dei tang ka South West Khasi Hills kaba la ïoh pdiang ïa ka jingpahuh ha ka rukom hap slap.
Ka West Jaiñtia Hills ka dei kaba la ïoh ïa ka jingduna slap kaba kot haduh 79%, bud pat da ka West Garo Hills kaba long 71% bad South West Garo Hills kaba long 70%. Ka East Jaiñtia Hills bad North Garo Hills kila ïoh ïa ka jingkheiñ ïa ka jingduna kaba long 66%, katba ka West Khasi Hills ka jingkheiñ ba la ïoh ïa ka jingduna ka long 67%. Napdeng kitei ki District, ka South West Khasi Hills ka dei tang ma ka hi kaba ïoh ïa ka jingkheiñ jong ka jingïoh bun bha ïa u slap bad kala ïoh pdiang ïa u slap haduh 2,727.7 mm kaba la long palat ïa kaei kaba ka ju ïoh baroh shi katta kaba long 1,851.6 mm, ka jingheh da 47%.
Ka East Khasi Hills, Ri Bhoi bad South Garo Hills kila lum jingkheiñ ïa ka jingïoh duna bha ïa u slap kaba long 54%, 48% bad 51% hapoh jong kaba ki dei ban ïoh slap. Ka Sohra kala ïoh pdiang 5,277.2 mm, kaba don jingduna kumba 36% na ka jingïoh slap kaba baroh shi katta kaba long 8,301.1 mm, katba ka Mawsynram kala ïoh ïa ka jinghap slap kaba long tang 6,169.1 mm pyrshah ïa ka jingïoh kaba barabor kaba long 9,338.4 mm, ka jingduna kaba long 34%.
Ka Nongstoiñ kala mad ïa ka jingduna slap kaba long 62%, kala ïoh pdiang ïa u slap uba long tang 996 mm na kaei kaba ju ïoh kaba long 2,641.8 mm. Ka Jowai kala ïoh ïa ka jingduna kaba 66%, katba ka Tura kala long hapoh jong ka 59%.
Ka Baghmara kala ïoh pdiang 2,258.6 mm, bad kala don ka jingkiew kaba 22% na ka jingslap kaba ju mad baroh shi katta.
Ka IMD kala kdew ba ki jaka kiba duna ïa u slap kata 60% haduh 99% kum kaba la duna jur bha, katba ka jingduna kaba naduh 20% hadien 59% ka dei kaba la ñiew kum ka jingduna kaba biang”.
Kine ki jingkheiñ ki pyni ba kala don ka jingbym ryntih ha ka rukom ïoh slap ha kylleng ki bynta ka Meghalaya mynta u snem, ha kaba bun ki District kila ïoh pdiang duna bha ïa u slap bad na ki por jong ka jingslap kaba baroh shi katta.
