Shillong, Risaw 02
Ha kawei ka jingjia kaba sngewsih, ïa ki kmie ki kpa bad ïa ki paidbah nongshong shnong ruh kumjuh, ha kaba iwei i khyllung, i la khlad noh ha shiteng lynti jong ka surok kaba ym shym la pat shna pynbha haduh mynta.
Katkum ka jingsaphriang ha ki rynsan social media, la ïohi ba ka kmie itei i khyllung, ka la ïam paid dohnud ryngkat bad ka thum ïa i khun, iba la khlad noh ha shiteng lynti.
Kane ka jingkhlad noh itei i khyllung kadei ha ka por ba ka Kmie ki bahaïing hasem ki dangthmu ban rah sha ka jaka sumar.
Katkum ka jingïoh lum jingtip, ine i khyllung ba la khlad noh ha shiteng lynti, idei na ka shnong Domkyrkoh, Rambrai Konstitwensi, kaba ka surok ka long kaba sniew bha bad ka bym pat shna pynbha haduh kine ki sngi.
Bunsien ki nongmihkhmat paidbah ki kdew ba ka surok kadei u budlum ka ïoh ka kot, hynrei kaba ngi hap ban pyrkhat ka long ba kan jia aiu lada kita ki jingkren ka sah tang ha ki jingkren pyllait jynhaw khlem da ïohi ïa ki kam.
Katkum ka jingïoh jingtip, la ong ba ka la don ka miet kaba kane ka longïing na katei ka shnong ka phone ïa ki kali kiba marjan ban wan shaw lem ban leit shah sumar na bynta i khyllung, hynrei baroh ki kyntait namar ban poi sha katei ka shnong ka sohsat palat ka lynti.
Ki don kiba ong pat, to wan ha ka shnong Mawdet bad wan shaw pat, hynrei ka lynti ka jngai bad la buhteng ban rah pat ha ka step kaba bud.
Hynñiew baje mynstep, ki kmie ki kpa ki la bah ïa la u khun ban poi sha ka shnong Mawdet ban don ba wan shaw ïa ki ban poi sha jingsumar, hynrei ha ka jingïaid lynti kaba lai kynta ban poi na Domkyrkoh sha Mawdet kaba shim por 3 kynta, i khyllung i la khlad noh na sla pyrthei.
Na kane ka jingjia, ka la mih ka jingkylli ba mano ban shim jingkitkhlieh halor kane ka jingkhlad noh I khyllung bad ba la hap ban phai biang sha shnong, khlem da ïoh ban phah sumar ïa i.
