Shillong, Risaw 02
U Bah Moonlight Pariat uba dei u MDC shimet na Jowai South, un pynïasoh noh sha ka Bharatiya Janata Party (BJP) ha ka sngi Saitjaiñ. Ïa u Bah Pariat yn pdiang sha ka BJP ha ka jingïalang ban pynlong ha ophis jong ka, ha ka por janmiet.
Haba ïakren bad u Bah Wankitbok Pohshna uba dei u Secretary ka BJP Meghalaya State Unit u la ïathuh bad pynthikna ba ka jingrung BJP u MDC na JHADC kan long ha ka por 4:00 baje janmiet ha ophis treikam jong ka ha Shillong.
Ha kawei pat ka khubor, la ong ba u Myntri ka tnad Kam Pohïing ka Ri u Amit Shah um pat ai ïa ka rai la un don bynta ne em ha ka jingïalang ban pdiang burom ïa ki nongkyrshan jong ki MLA ka UDP ki ban leit ban pynïasoh sha ka BJP kaba la pynbeit ban long ha ka 5 tarik Risaw 2026.
U Amit Shah un wan sha Shillong ha ka 4 tarik mynta u bnai ha ka por janmiet bad un sah shimiet bad ha ka por 9:00 baje mynstep jong ka 5 tarik Risaw un leit sha ka jingïalang ha JN Stadium Polo ban leh burom ïa ki pulit Meghalaya.
Katkum ki khubor ba la ïoh lum la ïathuh ba hadien ba la kut ka jingïalang ha Polo u Amit Shah un leit sha ka jingïalang jong ka BJP ban pdiang burom ïa ki nongkyrshan jong ki 8 ngut ki MLA na ka UDP.
Ha kane ka sngi ka BJP kan leh burom biang ïa ki phra ngut ki MLA ka UDP bad ki nongkyrshan hakhmat u Amit Shah.
