Shillong, Risaw 02
U nongaiktien ba rangbah ka State-BJP, u Bah M. Kharkrang ha ka Sngi Thohdieng, u la ong ba kin dang don shuh ki nongïalam ba hakhmat ki ban pynïasoh sha ka seng ha kine ki sngi ban wan hadien ka jingpynïasoh ba dang shen jong ki 8 ngut ki MLA ka UDP.
“Ha kine ki ar-lai sngi ban wan, phin sa ïohi shuh ïa ki nongïalam ba hakhmat ki ban pynïasoh sha ka seng jong ngi. Ngin sa pyntip sha phi ynda la dei ka por,” la ong u Bah Kharkrang ha ki nongthoh khubor.
Haba kylli hato ki nongïalam ka NPP bad TMC ki dei napdeng kito kiba la phah ïa ki ‘feeler’, u la ong, “Ngam lah ban ong mano ba la kynjoh sha ngi. Ngam kwah ban batai bniah ïa mynta.”
U Bah Kharkrang u la ong ba ki jingpynïasoh ba dang shen ki pyni ba ka BJP ka la nang kiew kumba la ïathuh lypa.
“Phi kynmaw hynriew bnai mynshwa ngi la ong ba ka BJP ka la nang kiew bad u snem 2028 un long u snem ha kaba ka seng kan ïoh ‘Double-Digit’? Nga la ong hi dalade ïa kata. Kine ki dei ki dak jong kata. Ngi kyrmen ba kine kin long kiei-kiei kiba manbha na ka bynta u snem 2028,” u la ong.
U la pynsngew ba ka jingong ba ka BJP ka long kaba pyrshah Khristan ka la nang duh jaka ha Meghalaya.
“Nga la dep kren mynshuwa bad ngan ong biang, tang kawei kaba ki don pyrshah ïa ka BJP ka long, ba ka pyrshah ïa ki Khristan. Hynrei ki briew ki la sngewthuh mynta ba kine baroh ki dei tang ki jingpynsaphriang ilekshon ban khring ïa u paidbah. Lada ki ïai bteng ban ngeit ïa kane, ha kaba kut ka Jylla hi kan duhnong,” u la ong.
“Katto ka la biang. Ka la treikam ha ki por ba la dep hynrei ngam tharai ba kan treikam biang. Kane kam ju neh slem, ki briew kin sngewthuh ïa ka jinglamler kaba don sha lyndet jong ka,” la bynrap u Bah Kharkrang.
Halor ka jingkynnoh jong u heh ka Congress, u Bah Vincent H. Pala ba ka BJP kan thmu sa ïa ka NPP hadien, u Bah Kharkrang u la ong, “Em, ym don kaba kum kata. U Bah Sanbor Shullai u la dep kdew ba ngim don eiei pyrshah ïa u Myntri Rangbah ka Jylla bad un ïai bteng ban pyndep ïa ka samoi treikam jong u.”
