Shillong, Nohprah 17
U Myntri Rangbah ka Jylla, Conrad K Sangma u la ong ba ka Jylla kam dei ban don ki nongdih drok bad ka Sorkar dang hap ban bishar bniah biang halor ka kaiphot kaba batai ba ki don haduh 3 lak ngut ki nongdih drok hapoh ka Jylla.
U la ong ba lada long kumno-kumno ruh bad lada ka long shisha kaba dei ba ki don bun ki nongdih drok, ka Sorkar kan hap ban trei shitom.
“Kam pher ka jingbun ne ka jingkhyndiat ki nongdih drok, hynrei ka thong jong ka sorkar ka long ban khang beit sbak ïa u drok ban rung sha ka Jylla. Ngim dei ban don ki nongdih drok”, la bynrap u Conrad.
Katkum ka jingong u Myntri Rangbah, kaba donkam mynta ka long ban bthat ïa u kynjri uba pynpoi ïa u drok sha kane ka Jylla, bad dei ban ther ïa ki briew kiba donkti ha ki kam khaïi, naduh kiba die haduh ki nongwanrah.
Haba kren sha ki lad pathai khubor ha ka Sngi Ba-ar hadien ba la dep plie ïa ka thanat jong ki pulit Anti Narcotic Task Force (ANTF), u Conrad u la ong ba ka jingtalasi drok yn leh katkum ka aiñ jong ka Anti Narcotic bad u la pynpaw ba ka Sorkar kan ïakhun tyngeh pyrshah ïa u drok.
Ïa kane u la ong haba kylli halor ka jingkren jong u MLA ka BJP, Bah Sanbor Shullai dang shen, uba la ong ba ka jingtalasi drok dei ban leh ha baroh ki khyrdop ba rung sha ka Jylla, kynthup ïa ki kali u Myntri Rangbah, ki Myntri Sorkar, MLA, shipai bad kali pulit.
“Kat kaba ngi ïoh ïa ka jingai jingmut na ka task force, kaei ka jingtip ba ngi ïoh na ki tnat syntiat ngin shim kam da long kumno-kumno ruh. Kane ka long ka mat kaba donkam bha na ka bynta jong ngi, ka Sorkar ka kut jingmut ban leh ïa ka kam”, u la ong.
Ha kaba ïadei bad ki jaka sumar, u Conrad u la ong ba ka Sorkar ka donkam ka jingïatreilang namar tang ka Sorkar kan ym lah ban long kaba jop.
“Ngi phaikhmat sha ki kynhun kum ki dorbar shnong, ki seng treimon sngewbha ba kin pynïaid ïa ki jaka sumar. Ka Sorkar kan bei pisa bad kan ai ka jingkyrshan kaba pura, ngi kyrmen ban lah buh bun tylli ki jaka sumar, bad ngin sdang na ki jaka ba la kham shah ktah bha”, la ong u Myntri Rangbah.
