Shillong, Nohprah 18
Uwei u rangbah u la duh ei noh ïa la ka pisa kaba long da ki lak tyngka, ka mobile phone, ka jaket bad kiwei ki tiar donkam, kiba la shah tuh noh ha uwei pat u briew.
Katkum ka khubor kaba la ïoh na ki pulit la ong ba u Frayzing Ch Marak u la ai ka jingujor sha ki pulit ba ha ka 12 tarik mynta u bnai, u la leit sha Guwahati, Assam da kawei ka kali kaba don ïa u registration number AS01-FZ-3087 kaba la ñiah da u Monirul Islam, na ka bynta ban leit thied kali na Guwahati.
Shuh shuh ka khubor ka la ong ba utei u briew uba la ai ka jingujor ynda u la poi ha katei ka jaka, u la leit ban sah noh ha kawei ka hotel ha Guwahati. La ong ba kham hadien ha ka por kumba 11 baje mynmiet, u Monirul Islam u la tuh ïa ka mobile phone jong u, kawei ka jaket, ka pisa kaba long T.4.61 lak bad kiwei ki kot ki sla kiba donkam bad ban phet bak na katei ka hotel.
