Shillong Nohprah 18
U MLA ka South Shillong konstitwensi, Bah Sanbor Shullai ha ka Sngi Balang u la lum ïa ki longïing baduk kiba don hapoh ka konstitwensi ban sam da ki marbam ryngkat bad ka pisa ba kin ïoh thied ïa u cake Khristmas, kumba ïoh lem kiwei.
Ha kane ka sngi ki la don haduh 150 tylli ki longïing baduk kiba la ïoh jingïarap na u MLA. Ïa kine ki longïing baduk la jied da ki Dorbar Shnong na ki 7 tylli ki shnong kiba hap hapoh ka South Shillong Konstitwensi. Kane ka jingsam jingïarap jong u Bah Sanbor ka long ban pynthikna ba kine ki longïing kin ïoh ïa ka bam kaba pahuh ha kane ka Khristmas bad ha ka por ba rakhe snem thymmai.
Ka jinglum jong u MLA ïa kine ki longïing baduk ka la long hadien ba u la ïakynduh ïa ki katto-katne ki khynnah na ki longïing baduk hapoh ka konstitwensi kiba la ong, “Mama ngim ju ïoh bam Cake Khristmas, ngin wan shim na ïing jong phi uwei”.
Haba kren ha ka jingïalang ba lyngkot, u Bah Sanbor u la ïathuh ba ïa kane ka jingïarap ba u la ai sha kine ki longïing baduk u la pynïoh na ka Discretionary Grant haduh T.7 lak, ha kaba u la lah ban ai mar T.2000 ban thied cake, ryngkat shi song khaw (25 kilo) kawei ka longïing, u dai, ka umphniang bam, ka shini bad kiwei kiwei ki tiar.
U Bah Sanbor u la ong ba u don barabor ha syndah jong ki paidbah kiba duk ba jynjar bad um ju pynleit thylli haba ki wan ban pan jingïarap naduh ka bai skul bai dawai. U la ong ba lada ki don ki jingduna kim dei ban khuslai namar u don u MLA ryngkat bad ki paidbah baroh 24 kynta.
U Bah Sanbor u la kitbok ïa ki paidbah ban ïoh ïa ka Khristmas kaba suk bad kaba kmen bad ban buh jingduwai mar kylliang na ka bynta ki baduk basuk, kiba pule bad kiba pang ba shitom bad ban kiew shaphrang ha ka jingim.
Nalor kane, u la kyntu ruh ïa kine ki longïing baduk ba lada ki mad ïa kino-kino ki jingeh, kin wan sha u bad u long uba kloi ban ïarap ïa ki.
Ha shwa ban ai ïa kine ki marbam bad ka jingïarap pisa, la ïoh ruh ka jingduwai na u Babu Ketikis Benedict Marweiñ.
