Shillong, Nohprah 18
Ka Meghalaya Board of School Education (MBoSE) ka hap ban pynkynriah noh ïa ka eksamin kaba dei ban pynlong ha ka 21 tarik Rymphang 2025 namar kane ka sngi kan ïatyngkhuh bad ka sngi thep ‘vote’ na ka bynta ka ilekshon sha ka Ïingdorbar Khasi Hills Autonomous District Council (KHA DC) bad Jaiñtia Hills Autonomous District Council (JHADC).
Kum ban kdew hangne, ka sngi thep ‘vote’ kan dei ha ka 21 tarik Rymphang, 2025. Ha kane hi kajuh ka sngi, ka MBOSE ka la dep pynbeit ban pynlong ïa ka eksamin Secondary School Leaving Certificate (SSLC) bad ka eksamin Higher Secondary School Leaving Certificate (HSSLC).
Ki samla pule kin thoh ïa ka eksamin SSLC ha ka sobjek Jingkheiñ ha ka 21 tarik Rymphang 2025, katba ki samla pule kiba thoh ïa ka eksamin HSSLC ka dei ka sobjek Vocational/Poultry Farming/Computer Technique-IV.
Haba ïakren bad ki ophisar ka tnat pule-dangle ban ïoh jingshai kaei kaba ka tnat pule-dangle bad ka MBoSE kan leh namar kane ka jingïatyngkhuh ka eksamin bad ka sngi thep ‘vote’, la ong ba ka tnat pule-dangle kan sa khmih ïa kane bad yn sa shim ïa ka sienjam kumno ban leh.
La ong ba ka sngi thep ‘vote’ ka ju dei ka sngi ban ai shuthi khnang ba ki paidbah kin ïoh ban leit thep ‘vote’ bad yn hap ban pynkynriah bad pynbeit thymmai ïa ka sngi thoh eksamin.
Shuh shuh la ong ruh ba ki samla pule kiba thoh ïa ka eksamin SSLC khamtam kiba dang ïakhun ha ka sien banyngkong ki dang duna bha kiba la kynjoh 18 snem ka rta.
Hynrei ki don pat ki samla kiba la dap 18 snem ka rta ki ban sdang thoh biang ïa ka eksamin SSLC khamtam kito kiba la dep ïakhun teng ïa ka eksamin bad ki khlem pat pass ha ki snem ba la leit noh.
La ong ruh ba ki don bun ki samla pule kiba thoh ïa ka eksamin HSSLC kiba la kynjoh 18 snem ka rta bad ki dei kiba rung kyrteng kum ki nongthep ‘vote’.
Ka eksamin SSLC, 2025 kan sdang naduh ka 10 tarik Rymphang bad la buh ba kan kut ha ka 21 tarik Rymphang. Ka eksamin HSSLC kan sdang ha ka 18 tarik Rymphang, 2025 bad kan kut kham slem namar ka jingpud sngi ban pynlong ïa ka eksamin.
Ka jingpynlong ïa ka ilekshon ban jied thymmai ïa ki nongmihkhmat sha ka Ïingdorbar KHADC bad JHADC hap ban pyndep shwa ka 5 tarik Lber, 2025.
Ka Ïingdorbar KHADC bad JHADC ki hap ban ïoh ïa ki dkhot kiba thymmai ha ka 5 tarik Lber lane shwa ka 5 tarik Lber, 2025 namarba ka samoi treikam jong ka KHADC bad JHADC kan kut noh ha ka 5 tarik Lber 2025.
