Shillong, Nohprah 18
U Bah Olan Sing Suiñ, MLA ka UDP na Mawsynram, u la ïathuh ba ka Dorbar Shnong Mawsynram ka la ïeng skhem ha kajuh ka nongrim ban ym shah ïano-ïano ruh ban leit lehniam hapoh ka krem Mawjymbuiñ, ha kaba u la ong ruh ba ki briew ba na shabar kim lah ban tuklar ïa ka rai jong ka dorbar shnong ha kaba ïadei bad ka krem Mawjymbuiñ.
U la ong ba ïa mynta kane ka kam ka dang sahteng ruh hapoh ka ïingbishar High Court, kaba la bthah ïa ka Deputy Commissioner ban thaw ïa kawei ka committee, hadien ba la mudui da kane ka kynhun halor ka jingbym ïoh jingbit na ka dorbar shnong ban leit lehniam ha ki khyndiat bnai ba la dep.
“Ka la don ka committee ba don ki dkhot na ki bor district, district council, tnat jngohkai bad ka dorbar shnong. Ha kane ka committee ka dorbar shnong ka la ïeng skhem beit ha kajuh ka nongrim ba kan ym ai jingbit ban lehniam hapoh ka krem Mawjymbuiñ”, la ïathuh u MLA.
U la ong, namar ba ka krem Mawjymbuiñ ka hap hapoh ka jingkhmih jong ka dorbar shnong, kumta ki briew kiba na shabar kim lah ban leit tuklar da kaba ïaleh pyrshah ïa ka rai jong ka dorbar shnong.
Halor ka jingbyrthen ka kynhun Kutumba Surakshya Parishad (KSP) ban khang ïa ka surok kaba rung sha Meghalaya, u Bah Olan u la ong, ka long kaba donkam ha kane ka por ba ka Sorkar Jylla kan tuklar hi noh khamtam ba ka don ka jingbyrngem na katei ka kynhun.
“Nga sngew ba ka Sorkar ka la dei ban tuklar ïa kane kam, hadien ba ka kynhun ki hindu ki la byrngem ban pakhang ïa ki surok kiba rung sha kane ka Jylla”, la ong u Bah Olan.
Kum ban pynkynmaw ka seng Hindu, ka Kutumba Surakshya Parishad (KSP) ha ka sngi Ba-ar ka la byrngem biang ïa ka Sorkar Jylla ba ka dei ban plie noh ïa ka krem Mawjymbuiñ hapoh ka 23 tarik mynta u Nohprah khnang ba ki Hindu kin ïoh leit lehniam, lem kumta ka Meghalaya kan hap ban mad ïa ka jingshah pakhang surok.
U President ka KSP, Satya Ranjan Borah, u la ong ba ka kynhun ka khot biang ïa ka Sorkar Meghalaya ba ka dei ban lum ïa ka jingïalang bad baroh ki kynhun ha kaba ïadei bad ka jingplie biang ïa ka krem Mawjymbuiñ ban ïoh lehniam ki Hindu. U la ong ba ka KSP ka la buh ïa ka 23 tarik Nohprah kum ka sngi ba khatduh ban pynlong ïa ka jingïalang bad ban pynbeit ïa ka jingleit jurip sha krem Mawjymbuiñ.
“Ka jingbym lah ban pynurlong ïa kine ki jingdawa kan lam sha ka jingshah pakhang ïa ka surok ha Jorabat ha shwa ka Khristmas”, la ong u Borah.
