Shillong, Nohprah 18
Ka United Democratic Party (UDP) ka la kyntait ba kan don ka jingktah ïa ka seng ha ka ilekshon MDC ka ban sa long, namar ka jingïatreilang hapoh ka Sorkar MDA-II ba la ïalam da ka National People’s Party (NPP).
“Ki kam bad ki mat hapoh ka Sorkar bad ki kam hapoh ka district council ki ïapher bak-ly-bak bad ngam kwah ban pynïakhleh lang ïa ki mat. Ki ïapher bun bad kan ym don jingktah ïa ka seng”, la ong u Working President ka UDP uba dei u MDC liang pyrshah ha KHADC, Bah Titosstarwell Chyne.
Haba pynkynmaw ba ka UDP ka la shah kynjat noh ha ka NPP na ka executive committee ha KHADC, ha kaba ka NPP ka la thaw ïa ka executive bathymmai bad ki MDC ka Congress, u la ong, “Lada ka NPP ka lah ban ïatreilang bad ka Congress hapoh ka executive committee, kumno kan ktah ïa ngi”.
Ka jingshah kynthoh ha ka rukom synshar bad jingshah kynnoh bamsap ïa ka Sorkar ba la ïalam da ka NPP ba synrop lang ka UDP bad kiwei ki seng saiñpyrthei ka la jubor bha kaba lah ban ktah ruh ha ka ilekshon.
Ha kawei ka liang, haba kylli halor ka jingpynbna ïa ki kyrtong UDP ha ka kylla kaba ar, u Bah Titos u la ong ba ka jingpynkhreh baroh la dep na ka bynta ka thup kyrteng kaba ar. Na ka liang ka seng kan pyrshang ban pynkloi noh ban pynbna katto-katne ki kyrteng ha shwa jong ka Khristmas.
U Nongïalam ka UDP u la pyntip ruh ba ka jingpynbna ïa ki kyrtong kan long ha ki bynta-bynta, namar ba hap ban bishar bniah ïa ki kyrtong kiba la pan tiket, khamtam ba ka seng ka buh thong ban pynïakhun kyrtong ha baroh 29 tylli ki konstitwensi, ka KHADC bad JHADC.
