Shillong, Nohprah 18
U President ka Meghalaya Pradesh Congress Committee (MPCC), Bah Vincent H Pala, u la ong ba ka Congress kan sa leh bha na baroh kiwei pat ki seng saiñpyrthei bad um don jingartatien ba ha kane ka kynti ka seng kan jop bun ki MDC.
Haba kren sha ki lad pathai khubor ha ka Sngi Balang, u Bah Pala u la ong ba ka Congress kan sa pyllait ïa ka thup ba nyngkong jong kyrteng ki kyrtong ki ban ïakhun ïa ka ilekshon MDC ha ka Sngi Palei ka 19 tarik mynta u bnai.
U la pyntip ruh ba ka Congress kan pynïeng kyrtong lut ha baroh ki konstitwensi kiba hap hapoh ka Khasi Hills Autonomous District Council (KHADC), katba ha Jaiñtia Hills Auto-nomous District Council (JHADC) pat kan sa pyllait noh katto-katne ki konstitwensi, ha kaba kan don pat ka jingïatreilang bad kiwei na ka bynta ban ïoh bun ki nongjop.
“Ngi la long kiba la pynkhreh bha namar ngi la trei shitom mynta la lai ne saw bnai ban pynïoh ïa ki kyrtong kiba biang ka jingnang jingstad bad kiba biang nadong shadong,” la ong u Pala bad bynrap ba nalor kane, ha kine lai bad saw bnai, kum ka seng ki la dep ban ai ruh ka jinghikai ïa ki kyrtong, kumjuh ruh ïa ki block President, Secretary bad ïa ki katto-katne ki Nongïalam, khnang ba kin sngewthuh ïa kaei ka mat ba kin kren sha u paidbah bad ba ka jingkren ruh kan dei kajuh ka sur na baroh.
“Ngi la dep ban tip ba ka ilekshon ka sa don beit ha u snem ban wan, kumta ngi la dep ban pynkhreh bha ïalade. Ngi la pynkhreh ruh ïa ki aplikeshon naduh ka 3 tarik ban khot ïa ki kyrtong kiba kwah ban ïakhun bad ha kaba ngi la ïoh lut ki aplikeshon. Don katto-katne ki konstitwensi kiba don bun kiba pan tiket, kumta ngin hap ban hiar sha kito ki konstitwensi ban sngap ïa ka sur bad peit bniah bha shwa,” la ong une u Nongïalam ka Congress ha Meghalaya.
“Ngim kwah ba ka jingai tiket kan long ka jingmyntoi jongno-re-jongno hynrei tang uba dei hok ban ïoh u dei ban ïoh ïa ka tiket,” la ong u Bah Pala bad bynrap, nga khlem poi pyrkhat ba ka jingwan jong ki briew, ki Nongïalam bad ki kyrtong jong kiwei ki seng ban pynïasoh sha ka Congress kan long kaba biang bha. Kumta nga don ka jingkyrmen skhem ba ka Congress kan sa leh bha na baroh kiwei ki seng saiñpyrthei, namar ngi don ïa ki kyrtong kiba don ka jingnang jingstad bad kiba biang lut nadong-shadong bad ngi la long kiba la khreh pura.”
“Ngam don jingartatien ba ngin jop bun ha kane ka ilekshon MDC. Ngi la trei shitom ban pynïoh ïa ki kyrtong kiba biang, ngi la ïoh kiba biang. Hooid ki don ki barim hynrei kiba bun ki kyrtong ba ngin sei kin dei ki dur thymmai,” la bynrap u Bah Pala.
